2017年9月26日 星期二

蜜桃成熟時.......................

呢兩日我好沉迷睇國內真人騷

原因係陳小春個仔同鄭希兒個女,兩個小朋友都好可愛

陳小春個仔Jasper好懂事好溫柔完全係暖男

鄭希兒個女好靚好得意

晌睇過程中有好多共鳴,我指湊仔會發癲共鳴

外界好多聲音話陳小春太惡、鄭希兒無耐性

其實都要知道為人父母都係人,都會有頂唔順一刻,當然我都係一樣

湊仔就係有好多逼到埋牆角感受,我有時見到包包掂到污糟嘢個反應更加利害

所以睇就容易,但湊仔真係唔易

我最唔容易係煮飯,每一餐都要諗煮乜比個仔食,又要味道好、有要有營養又要有賣相

今日包包午餐份蜜桃牛柳係成功,包包雙手無離開過隻碟,就係咁佢晌度捉實直到我影完囉


終於食得到,你睇佢幾專心


食譜:

牛柳   1至2件切件或粒

紫洋蔥   少許

蒜頭   1粒

蜜桃   2塊切件

醬汁:

茄汁   1湯匙

生抽   1/2茶匙

糖   1茶匙

做法:

洋蔥、蜜桃、蒜頭切切切切切

牛柳鹽煮之前可以用少少鹽、生粉撈一撈


先將牛柳爆香至半熟再加入洋蔥、蒜頭兜勻,最後加蜜桃


醬汁材料撈勻後就加入牛柳入兜勾就可以上碟呢




2017年9月25日 星期一

秋飯


其程度上我都幾鍾意發掘d簡單食譜

直頭乜都掉晒落去就得,尤其係要兼顧好多唔同事之時

上星期五我趁包包返學一個人出去行超市,晌一田漫無目的地見到 Kinki(喜之次魚)

又見到牛肝菌,我完全無乜過用來做乜之下就買

當然魚係買比包包食,佢好鍾意食魚,而我又好鍾意食喜之次

其次個牛肝菌就只諗到整飯,再配上栗子

呢個係秋日中之未有味飯,出來味道好好所以好想寫比大家呢

有d食譜大家可能會唔覺得有乜特別,但寫果個其實係好想分享喎



自己整kinki唔同出面可以燒到骨都脆,但煎就唔得

好多細骨要慢慢挑骨比呀包


個飯好容易做

用20g牛肝菌,+雞湯浸2-分鐘
雞湯份量係平日煮飯一樣,我煮2嘜米就配2碗水

我用自己淆既雞湯,大家如果買雞湯可以買有機那種,唔會添加太多鹽的,反而史乜乜隻偏鹹,反正我唔會接雞湯生意,所以老實講又何妨?哈

栗子就隨意加,秋天栗子開始當造

洗好米後就加埋牛肝菌及雞湯、栗子及1/4鹽,放晒入飯煲等飯熟後唔好開蓋焗多5分鐘便完成






大少奶's Delicatessen

宣傳你的專頁

2017年9月24日 星期日

戒奶的疑惑

近日我收到一個電郵,講述有調查指近年香港嘅小朋友好早戒奶

對奶類攝取不足等等........

其實包包都已經三歲,身邊當然好多人七嘴八舌咁話:咁大個仔戒奶啦、佢都食飯就戒奶啦

記得包包一歲半時,健康院姑娘就話:佢要開始戒奶,奶對佢來講只係飲品

心諗:奶茶、咖啡、檸檬茶都只係飲品,但又唔見啲人咁積極去戒?

小朋友飲奶都無可厚非丫,佢哋有自己飲品唔好咩?

而且包包飲完奶暖下肚就會瞓得好

後來又睇啲報導,原來要小朋友早戒奶原因係:飲得奶多會蛀牙,因為奶粉中有糖份,甚至有啲奶粉係有香料

如果奶粉較甜,容易令BB吸收糖份,呢類奶粉係好容易飲到BB肥嘟嘟

肥嘟嘟BB當然又得意又可愛,過早吸收糖份唔係好事,而且會影響牙齒生長

而有啲奶粉好重香味,呢種香味的確吸引到BB,不過香味其實係添加劑

我對香精油有敏感,食完會唔舒服甚至頭痛,所以我揀奶粉從來唔揀有香味嘅

呢類香味添加物仲有機會令BB腸胃敏感繼而衍生各樣皮膚問題

睇過晒有關報導後我仍然繼續比包包飲奶!


因為包包係飲雀巢®超級兒童能恩®4號奶粉(https://goo.gl/hMWLwz),呢隻奶粉含pHF水解蛋白配方,能有助防敏,仲係不添加蔗糖及雲呢拿味


除了唔怕腸胃敏感外,更加唔怕佢太甜或有香味添加,減少包包養成嗜甜習慣

所以媽媽們,唔好只貪求食肥BB奶粉或者有香味奶粉

而真正對BB健康好係要小香味更加小甜味,而且從BB有第一隻牙齒開始就應該要幫BB清潔口腔及牙齒

包包直到現在除了刷牙外,我會用紗布幫佢再抹多次牙仔,希望佢牙仔能夠健健康康到換牙啦

做了媽媽我會發覺一定要揀得精明,坊間太多太多不同說法難以分對錯,只能夠係能力範圍內去選擇得最好~

#資料由雀巢防敏1000天計劃贊助  #戒奶 #精明媽媽



2017年9月22日 星期五

花燈炒鮑粒 x 李錦記蠔油

一年容易又中秋,中秋節都好著重團圓
有乜好得過一家人或朋友一齊食過節飯,不過整過節飯都唔係咁容易
要整多幾款菜式又要好味又要靚,心機都唔少得
所以我決定寫個又脆又靚但又容易整的 "花燈炒鮑粒"











個花橙其實係用炸雲吞皮去整,做成一個杯型裝住蔬菜粒同鮮鮑魚粒
最重要係只用李錦記蠔油去做調味兼提鮮,利用蠔油辟去蔬菜草青味
又唔需要加太多調味,一枝蠔油就攪掂哂

食譜:
新鮮鮑魚   6隻
鮮露筍     5條
珍珠 筍    4條
紫洋蔥     1/4個
雲吞皮     12片

調味:李錦記舊裝蠔油   1/2湯匙

做法:
新鮮鮑魚去殼,用刷洗再沖乾淨,切粒備用


露筍、珍珠筍、紫洋蔥切粒備用

先炸雲吞皮,預備兩個鋼篩,將雲吞皮放上個篩上疊起(如下圖)



再放另一個篩上面,放入油鍋度炸,雲吞皮定型後會變成杯型,炸至金黃色便可以上碟備用

先爆香露筍、珍珠筍、紫洋蔥粒,然後放入鮑魚粒炒勻


 
加上李錦記蠔油,然後兜勻


炒好餡料放上雲吞杯上便完成





2017年9月21日 星期四

慳力

我唔知點解兩父子咁鍾意食豉油王炒麵,對我來講無乜吸引力

不過…昨日煲粥食就諗不如試下炒麵

隻臭包最怕食粥,佢唔食粥都可以食下炒麵

其實豉油王炒麵好容易整,又唔需要多配料

真係簡簡單單一餐之選,今次我證明自己試炒後,以後煲粥都唔怕佢兩個唔夠飽

仲要佢兩個非常之鍾意食,加辣醬後又真係幾好味

包包今日鼻涕蟲無返學,我都係長話短說,下回再講過…


去麵檔買兩個麵,其實足夠3個成人咁多

返到屋企要略煮,煮完要瀝乾水


買唔到銀芽,用芽菜搣頭搣尾

加韭菜花,大家可以用韭菜的

份量自己喜好啦

炒之前預備調味料:

2個麵 調味大約如下:生抽  1湯匙  老抽 1.5茶匙  糖  1茶匙

做法:將芽菜同韭菜花爆香,然後加麵入鑊兜勻

將調味料事先撈勻再倒入麵中兜勻就係

呢個份量調味剛剛好,其實個麵發起都幾多,大家如果兩個人應該用一個麵都夠

如果用一個麵調味方面就減半吧 




大少奶's Delicatessen

宣傳你的專頁

2017年9月18日 星期一

就係咁

近日突然好想食錦滷雲吞,細個晌酒樓飲茶老豆經常會叫

好彩我有個愛junk food老豆,否則人家係會錯失好多好味食物

其實我唔係第一次整,可能今次隔得耐,那種驚為天人感覺又回來

以前錦滷雲吞個汁係有珍肝、乜乜物物

今次只係用叉燒、蝦!當然我整炸物唔會得一家人食

早幾日朋友開始上我家食中秋飯喇!咁gathering無奶油係無炸物架嘛

咪係囉!就係咁啦


炸雲吞一part無難度,你處炸咪得囉

用雲吞皮包少少蝦膠或墨魚膠咁就去炸,炸到金黃色就done


汁料:

叉燒、蝦、隨意(其實你唔落肉就咁用三色椒等等都得架)

三色椒    每樣各一個

洋蔥   1個

汁料:

茄汁     3湯匙

白醋    3湯匙

糖   2湯匙-3湯匙

水   80ml

鹽    少許

另備生粉水少放許

將餡料炒香,將汁料所有材料撈勻(生粉水除外),倒入鑊同餡料煮勻

分兩次加入生粉水,個汁你可以自己調較杰度的




大少奶's Delicatessen

宣傳你的專頁

2017年9月15日 星期五

圓圓肉丸

包包返學後我唔見得好得閒,以前都會同佢出去午餐但而家就一定要日日煮

好彩包包返來胃口好好,好肯食飯

當然我都落足心機煮比佢食,佢午飯同晚餐都係煮得比較豐富

而我就一起身要為佢午餐去預備,好似今日咁整葡汁焗肉丸都花了一個早上

不過佢好鍾意食,我知佢鍾意食汁所以就煮葡汁

呢個葡汁係自己調較,唔似現成咁多 E30624700 味精或化學品

雖然都會落d椰漿但其實唔算好多呢

個汁仲令佢主動食西蘭花...............1粒咁多 囧



首先做肉丸,呢個係我好拿手

用大約1碗豬肉碎,加1/4個洋蔥粒、1隻蛋黃、1/4茶匙鹽同生粉去撈勻再攪到小小起膠便可以

醃佢1個小時就入味,我唔會用太多調味,但加洋蔥粒會多份香味同肉汁會豐富d

醃完之後就煎



唔需要完全熟因為會焗

如果唔焗都會回鑊煮,所以定型便可以


另外配料我用西蘭花、紅蘿蔔、洋蔥同2粒蒜頭

西蘭花同紅蘿蔔先用水烚下先

爆香洋蔥、蒜頭、紅蘿蔔後就加1湯即麵粉


麵粉炒完後就加黃薑粉 1茶匙之後加水500ml煮滾,再加鹽大約1茶匙

試味夠唔夠鹹,唔夠先再加鹽


所有材料回鑊加椰汁,我隨手落的

然後兜勻後就煮到汁杰身,放上焗盤 250度焗10分鐘(視乎焗爐火力而定)

唔焗就可以直接上碟








大少奶's Delicatessen

宣傳你的專頁

2017年9月13日 星期三

11

今日天氣好、心情都好好

所以post一個見到都感覺開心食譜,望到呢個牛油果好陽光

佢絕對係可以做早餐,做法又快又方便又易做又好味又乜乜物物加上又幾靚仔人品又好

做一份簡單早餐但又靚仔會令心情好足一日


做法簡單(我忘了影step)

將牛油果切一半起核再用匙挖大d個洞

然後放隻蛋入去蓋上錫紙放入焗爐用200度焗5-8分鐘

生熟度你可以控制的,5分鐘就揭開望望唔夠熟就焗耐多dd

焗好後加鹽、黑胡椒、同煙肉粒味道不錯的



無啦啦有人送花上門,當然係大少爺送比我

今日係結婚11週年紀念,11年好似係上年咁

今晚當然帶埋個仔去慶祝啦啦啦 




大少奶's Delicatessen

宣傳你的專頁

2017年9月11日 星期一

宏願

細個都算得上想要乜、想食乜都可以得到

但當然又唔係樣樣如是,好似依家咁我好愛包包,但佢喜歡食糖我無奶油比好多糖佢食

做父母總會係為小朋友著想

而小朋友想法就唔一樣,細個想自己住晌朱古力王國,又想日日薯片代替飯

總之人生除了零食就無其他想法,我仲會諗:哼!我大個一定買晒全超市薯片同朱古力

但到長大後我唔鍾意食薯片又唔再愛朱古力

有一次媽咪,居然係媽咪買過雪糕蛋糕比我食,當時那種驚為天人感覺仍在

點解蛋糕可以包住雪糕?我大個一定買10個比自己食

但唔知幾時開始雪糕蛋糕香港無得再買,早幾年都有一段時間有

近來又唔多覺眼,不過…多年後今日我唔係希望買得到,係希望整得到

結果…你望下幅相都知道我已經做到,哼~

仲要係好好味,本身我呢個蛋糕卷食譜係好香蛋味又軟熟,配上自選味道雪糕同我自家藍梅醬

咪就係好好味囉!




蛋黃..... 80g
砂糖.... 20g

菜油.... 60g
(你喜歡用乜油都可以,除了花生油外因為太大味)

暖牛奶.... 60g
低粉 ..... 80g 
泡打粉 ...... 1/2 茶匙

蛋白..... 120g
砂糖..... 60g

做法:焗爐預熱180度

將蛋同糖攪勻,加暖奶及油攪勻,篩入低粉、泡打粉

將蛋白+60g糖打至企身,用flof in方法混合蛋糊

放上焗爐焗盤上,用180度焗15分鐘

焗好後放一張牛油紙晌面(即是底面都有一張牛油紙)_,然後反轉佢放涼


搽上喜歡果醬


雪糕放室溫5分鐘
*大家可以選擇自己喜歡既雪糕味道,我就用 Toasted almond味雪糕去做

將雪糕鋪上蛋糕面,唔好貪心只需要放上一邊便可以

然後卷起,用壽司墊卷會靚d


卷好後就扎實放冰格兩小時後先拎出來食呢,個蛋糕質感唔會硬又有蛋香架





大少奶's Delicatessen

宣傳你的專頁

2017年9月10日 星期日

Primada 智能煲系列 - 提煉寶(PC8320) 開箱文


每一日煮兩餐比包包,仲要做食譜、接d宣傳稿做

基本上日日煮不停煮

一日得24小時花大半時間晌食譜同煮飯上,除了好累之外廚房都好容易變成戰場

所以我覺得如果有工具可以節省時間的話係最美好的

今次試用Primada 智能煲系列 - 提煉寶(PC8320),一個煲有不同功能

除有煲湯、燜、烤焗、焗蛋糕功能外仲有提煉功能更能取得食物精華,整黑蒜都冇問題。市面上不太多有此功能的同類型產品

加上智能按掣式,唔使我擔心會滾瀉或者下下要計時間,一按掣就可以放心做其他嘢

由於呢個煲能夠快速烹調為我節省唔少時間,上班族放工後都仲可以煲得到湯或糖水



好多人都問快速功能煲煲湯燜肉會易出味嗎?由於快速煮食係唔會令水份消失,所以水份唔需要加太多

明火煮食因為要預水份蒸發所以加多少少水,但快速煮食只需要剛剛好就會易出味呢

今次整花生糯米麥米粥我用煮豆類功能 25分鐘就可以,糯米同麥米都唔係容易煮嘅食物

慳番d時間足夠我可以同包包砌幾次積木啊

如果小朋友或老人家想食軟身啲,仲可以用「口感自選功能」調節



花生糯米麥米粥食譜

糯米   50g

麥米   60g

花生   50g

冰糖   適量

桂花   少許

做法:



將糯米、麥米、花生各浸水1小時


將糯米、麥米、花生加1000ml水放入內煲中


將蓋蓋上扭實

然後開啟,揀煮豆類功能,佢就會自動計時





當浮子閥降下後才開煲蓋放冰糖調味便完成

*喜歡的可以加少許桂花增加風味呢