2008年2月28日 星期四

蕉絲暮想


其實呢幾個Silicone baking cups係Karen同tan tan送比我既 b day gift

一直好想用,終於琴日趁仲有隻蕉整muffins用

大少爺一對住下屬會變嚴肅,如果一拎呢個蛋糕出嚟就會破壞形象

佢今朝自已脫模拎走蛋糕放番幾個模晌度,點都唔聽我講連埋隻杯啊!

我問佢點解?佢話唔想楂住對腳,哈哈哈!

↓張相好似客貨車公司既廣告,一群人企晌樹大聲叫:乜乜精神、快速過人

又似補習社廣告:黃Sir 係教英文既




香蕉令我諗起 07年9月去東京-->按此觀看

晌夾公仔店夾比我既香蕉公仔

一向唔鍾意公仔既我,床上只有一個士多啤梨公仔同呢隻蕉呢

點解咁耐都未到嗰日架?噢!


 


2008年2月26日 星期二

我要出蕉


今日覆診,已經好番喇!

好好休息多一個星期就可以完全回復過度活躍既我

下晝打電話比 "索龜GG"

佢竟然好大膽話我呢個星期係食咗【懵仔丸】

各位…唔好拉住我,我要爆佢個殼,哼!

大少爺請假陪我,當然無得去街啦

我技癢想整蛋糕,就整佢鍾意既香蕉蛋糕

明明隻蕉已經有梅花點,但就唔算太熟

佢只係塊皮熟,噢!

不過...個蛋糕都幾香呢




好鍾意呢個顏色啊




好眼瞓啊!nap nap先

2008年2月25日 星期一

1835000


喂喂~

如果你手提電話屋企電話經常被黑人憎電話錄音訊息滋擾

就可以打1835000

登記..........拒收預錄電話訊息登記冊

如果我BLOG可拒收無聊、九唔搭八、廣告留言就好喇








在 拒 收 訊 息 登 記 冊 登 記 號 碼 , 你 便 受 到 條 例 的 保 護 , 除 非 你 同 意 商 業 電 子 訊 息 發 送 人 向 你 的 號 碼 發 送 商 業 電 子 訊 息 , 否 則 在 拒 收 訊 息 登 記 冊 登 記 號 碼 後 十 個 工 作 天 起 , 發 送 人 不 得 再 向 你 的 登 記 號 碼 發 送 有 關 訊 息 。 在 保 障 生 效 日 期 後 , 未 經 你 同 意 而 再 向 你 的 登 記 號 碼 發 送 任 何 商 業 電 子 訊 息 , 即 屬 違 反 條 例 , 電 訊 局 長 會 考 慮 向 有 關 發 送 人 採 取 適 當 的 執 法 行 動 。

可以上以下網頁睇睇

https://www.dnc.gov.hk/zh/pub_general/rd/pub_faq_tc.html

屋企2、3字頭已經係上個月生效

可以再照登記

2008年2月24日 星期日

望梅止渴


收到加拿大Angel小姐寄來禮物,係一本好精美既cookbook

原本係聖誕禮物

由於郵寄地址並唔係自已屋企懶懶惰既我又懶去取信

所以過年前才收到手

全本都係咖哩食譜

裡面介紹唔同總類既咖哩,款款都好精美

我而家常常都拎嚟睇,希望好番後就動手製作唔同咖哩

在此...充心感謝 Angel










2008年2月22日 星期五

自娛節目


好耐無見既【大少奶珍藏】又出現

之前網誌分類:大少奶珍藏 放私人誌,而家公開番呢

今晚nap nap後無煮飯,大少爺買外賣我食

我行過玻璃櫃,Oh no...............又潮濕,但又開唔切抽濕

如霧起,暗暗蓋掩身邊你

好忍唔住走去執、又抹

放張櫈仔、又擺個茶几晌身邊遂一拎出嚟抹

好似傻婆咁無出聲披頭散髮咁默默地抹

又影張相,其實之前post過但影得唔靚

今次影得靚啊




最鍾意既有個單獨影

好細緻,連泡打粉都有




雪櫃滿滿的




部屋




開著電視




我仲有兩層未抹,實在太攰

呢層都無力抹喇!仲有一套士多啤梨系列未擺出嚟




如果大少爺買多個玻璃櫃比我就好喇!出咗好多新款啊啊啊啊啊

消失熱情


學最好的vanlily話齋...煮飯已經成為左你而家只可以做的活動, 所以一定要有咁花心思得咁花心思去煮

無所事事,食完藥就要瞓,但都要搵少少細藝

琴日鐘點姐姐嚟我唔駛煮嘢

我又想捱到睇完 EDC 既記者招待會先瞓,就焗個又好味又想食兼無難度既戚風蛋糕

今次整熱情果味

未食抗生素既我的確好似一個熱情果,到而家我只變成一個 "果",一個"蛇果"(懶過條蛇)

噢!好好努力捱兩星期,我既熱情就會返嚟

呢個蛋糕我食一件後。。。就成為大少爺既早餐與下午茶

今朝起身個蛋糕已成過去,一件不留地帶走

懷緬過去常陶醉....一半樂事一半令人流淚<--07年千嬅既版本




下晝nap nap後,今晚開始煮飯比大少爺食~

2008年2月21日 星期四

抗生素係....


我心目中抗生素既解釋係…止及抑壓龍精虎猛正常活吃喝玩樂元

退燒了。。。但要捱超過一星期既抗生素

一向過渡活躍既我,食完藥就只能瞓、瞓、同埋瞓

醫生話要食完全個course,又叮囑我唔好週街走

跟本佢比咁多抗生素我,我點有精神週街去?

入定糧食,包括買咗一pack魚

我對呢類魚無乜好感,所以我係都要整到好味先肯食

琴晚既晚餐除咗魚之外,仲有菠菜、加少量粟米

預計休息兩星期,我要諗下點樣可以食得好少少?~~~~~







2008年2月19日 星期二

清淡一週


無乜進展,琴日下晝連靚蝦吉打比我都無力起身聽

今日大少爺請假陪我覆診,將覆診時間改為上晝

照x-ray,打一支消炎針

醫生千叮萬囑要好小心而且需要較長時間痊癒

要食藥同覆診

睇完醫生大少爺陪買定糧食,預備我除覆診外都免外出

琴日鐘點幫我預先將米線過冷河、又幫我洗乾淨菜、滾定上湯放雪櫃

返到屋企一煮就食得

貫徹始終

發燒已經無胃口,當然要用盡氣力都要整靚氹自已食啦(氹自已食嘢,呢d咪痴線既表現囉)

醫生話食我唯一可以食既甜品係yoghurt




↓無論任何情況,牛肉都要食得好






索烏龜GG話我把聲一日衰過一日兼反應慢趁機咀gel gel我,我好返就"哼"爆你個殼

2008年2月18日 星期一

遺失聲音


各位要小心啊!醫生話近來流感好利害,診所都擠滿人呢

我而家瞓晌床用大少爺部notebook上網,仲少少燒呢。。。

連醫生都話唔急得,自細扁桃線都令我易發燒,已經習慣

但喉嚨連吞口水都痛係煎熬,琴日由大少爺協助下煲清補涼湯

今早鐘點姐姐開工大吉,整定嘢比我食呢

我講唔到嘢 唯有寫blog消消悶氣,悶極了!

我係 孤獨的發燒圓...........噢~







清補涼

有滋潤及清熱功效,煲湯加片陳皮、紅蘿蔔更好味
*如果有發燒外感就唔好落沙參

我既清補涼各樣材料係之前晌黃雙如間雜貨店【有食緣】買既,係標明無硫磺

好多中藥都會有硫磺加長保存期,所以去一般藥材店買就要浸洗乾淨,否則有酸味

清補涼仲可以煲糖水,好清潤呢

2008年2月14日 星期四

A Taste Of Love


Happy Valentine's Day!

食得好開心!原本想出去睇戲但好凍唔出喇

好多謝大少爺送比我既禮物

今晚我同大少爺既情人節晚餐有:



Starter... shrimp cocktail

個底係蟹子沙律




Soup...鮮磨菇湯

無整蒜蓉包,只有兩片多士








Main course...迷迭香紅酒羊架


side dish ...黑椒炒鮮磨菇蘆筍珍珠筍  另有焗迷你薯




Dessert...心太軟




七成熟唔太漏又能保持軟心,好滿意




Let me fill your heart with joy and laughter


Togetherness, well it's all I'm after





Happy Valentine&#39;s Day!


Happy Valentine's Day!

我好鍾意慶祝,無啦啦慶祝都開心,情人節當然又要慶祝下

禮物當然唔少得,晚餐我鍾意晌屋企自已整

我唔係吝嗇既人,但總覺得情人節同一個menu內菜式改過肉麻名例如…

浪漫醉人蔘清雞湯、相識只想心印心型牛扒、丘比特愛情之箭豬柳、郎情妾意粉、明天我要嫁給梳乎厘

就要收雙倍價錢

我會鍾意晌屋企自已煮,會多一份滿足感添啊!

為情人節晚餐努力!今晚見!等我啊


2008年2月13日 星期三

生日快樂!


初七人日


呢個係圖片唔係我整既,唔好誤會啊

Happy birthday to Youuuuuuuuuuuuuuuuuuuuuuuuu!

祝各位:身體健康、生活愉快

呢幾日好忙!我返屋企換件衫晏少少又要出去食晚飯

仲要預備聽日情人節既晚餐,我個菜單已經諗好喇

雖然又係西餐,但係我寧願自已煮喇!

勁鍾意呢個賀年mv啊 !裡面個個都正


2008年2月12日 星期二

令人回味


*出blog隨意門

新加坡土生土長既姑姐煮一手好味海南雞飯

我當然會有家傳食譜啦!

自已整可以去除雞湯內雞油無咁肥膩

街外既會用埋雞油令飯添光澤,但自已整就不必喇

呢幾日有親人到訪,我用海南雞飯去招待

我上星期就實習一次,鐘點姐姐幫我斬雞

但自已就唔知點斬好呢?會用鮮雞脾代替

配上新加坡買既黑醬油最好味!







食譜:

雞:

雞肚放入蔥段、薑、一條班蘭葉

另再用花椒、八角、薑片、蔥段、班蘭葉、少量鹽煮一鍋水,水位要能剛覆蓋隻雞,水滾後放雞入水中

預備一盤冰水

至剛熟時撈起放入保鮮袋,包好後即放入冰水浸至冷卻就可以斬開備用

浸冰水令雞皮變爽、雞油部份成jelly狀、雞肉嫩滑

飯:

用蒜頭幾粒、薑片2塊將米撈勻 或 亦可以先用薑、蒜頭將米略炒

將煮過雞既雞湯去油,代替水煲飯

2008年2月9日 星期六

甘甜暖暖 (附栗子露食譜)


年初三

祝各位:身體健康!萬事如意!

我好鍾意食栗子,尤其煲南瓜加栗子煲湯係我最愛

今次就整栗子露、即係栗子糊

香滑甘甜啊!食完感覺暖暖呢







白色碗係米漿,係會令糖水成糊狀,香滑皆因米漿

中式各樣糊類甜品都係加入米漿架

滑到忍唔住..........哼!


 


材料

(A)

栗子    1磅半(買已脫殼既)

冰糖    隨意調較

水       1公升

(B)

米       60g

水       1碗

做法:

1)熱水煲栗子,水滾後熄火,用毛巾搓一搓就容易將栗子外衣與栗子肉分開,但唔可以比栗子放涼,否則難脫衣

2)將米洗淨加一碗水浸3個鐘,浸好後連水加入攪拌機攪碎,攪好後用篩隔渣,成為米漿備用

3)1.5公升水加栗子及冰糖煲30分鐘,冰糖水、栗子分兩次加入攪拌機攪成漿,用篩隔渣至幼滑

4)將栗子漿翻熱加入米漿煲滾即可。



2008年2月6日 星期三

恭賀新禧~




.......恭喜發財!新年快樂!

.......




                    龍馬精神 萬事勝意 雞絲燉翅 出入平安 瘋瘋癲癲

                     壽比南山 東海壽包 身體健康 吉士泡芙 馬到功成

                     身壯力健 年年有餘 可口可樂 生意興隆 豐衣足食

                     山水豆花 一帆風順 大吉大利 南乳炆齋 快高長大

                     橫財就手 芒果涼粉 帶結同心 于歸之喜 干炒牛河

                     鴻運乳豬 百年好合 大展鴻圖 滿月薑醋 弄璋之喜

                     明珠入掌 蕃薯糖水  相親相愛 合桃蛋糕 緣訂三生 

                     佳兒佳婦 君子好逑 焗疏乎厘 美滿緣緣 唱隨諧樂

                     青春常註 笑口常開 新翁之喜 冰凍美祿 永懷德風

                     財源廣進 樂賦唱隨 聖誕快樂 珠圓肉潤 財色兼收

                    一帆風順 二人同心 三陽啟泰 四季發財 五福臨門
                    六六大順 七星捧月 八面春風 九運當頭 十全十美


                     不勞而獲 學業進步 天賜良緣 心想事成 白頭偕老

                     永浴愛河 駿業宏開 福如東海 年年歡樂 歡樂年年

                                                           大少爺、大少奶敬賀


樂在明廚 3


之前個凍柑就係寫食譜用既呢







2008年2月5日 星期二

輪到我


攪完間屋就輪到自已

呢兩年新年前都爆瘡、加上多嘢做好攰個樣殘晒

所以我就趁過年前狂敷mask兼一早就book定bobbi brown修眉

收爐前就煲定 冰糖生熟薏米水

加片檸檬就可以美白兼去水腫又滋潤,方便快捷

煲定入樽放雪櫃,食完賀年食物可以飲用,代替汽水呢

我要修補自已個殘樣

哼!(<--呢個係鄙視的哼)我直頭覺得自已個樣頹廢到襯唔起新衫







*薏米含澱粉、蛋白質、各種礦物質和維他命都很豐富,
中醫稱其有健脾胃、利小便、消水腫、寧神安眠之效,久食可以滋補強身。
 薏米更有清熱去濕之功,無論是寒底或熱底,食之皆無不良反應。
作為夏季消暑和冬令進補,薏米均為理想之物


2008年2月4日 星期一

第二底


原本打算聽日先整,但我實在太多嘢做喇

今日呢底將蘿蔔一半切絲、一半刨絲

係睇到咪吉咁整話會有口感

試味後覺得口感比全刨絲好啊!而且更甜蘿蔔味

切絲仲易過刨絲添啊

我以後再整一定會用番呢個方法

用瑤柱、蝦米、少許瘦臘腸,唔想加太多臘味呢

因為今次比上次存放耐少少,免成個雪櫃芫茜蔥味

所以無上次咁大草原呢




各位~~~

我收爐(煮食爐)喇!初幾啟市?(睇心情啦!)不過…我知道自已好快會手痕,實會忍唔得耐既

只係收煮食爐,但個blog會照update

哼!送個年尾哼比你哋

2008年2月3日 星期日

代替品


不枉我今朝早起身,天氣好好間屋攪掂晒!雖然好攰,但一切順利令我仲有心情 update

今年新年前好忙,無太多時間整各類賀年糕點,除咗蘿蔔糕外,乜都唔想整

終於諗到整南瓜軟餅,佢比年糕易做,但口感同年糕一樣

而且,只需要預備三種材料,快到15分鐘就攪掂

我決定用佢代替年糕,食既時候即整,雪櫃又唔駛放多底糕

之前整過一次,令我念念不忘呢

年廿九整多底蘿蔔糕就攪掂,yeah!!!!!!!!!!!!!!




食譜

材料:

南瓜  200g

糖       70g(可隨自已喜好多或少)

糯米粉   100g

做法

1) 南瓜起肉放微波爐叮4分鐘或蒸稔

2) 趁南瓜仍熱時加糖攪成蓉
 (叮 or 蒸完南瓜會有水份唔好倒棄,連南瓜一齊同糖攪伴)

3)加入1/3糯米粉攪勻,放涼後再加餘下2/3搓成麵糰
(如粉糰太乾可加少少水,太黏就用糯米粉做手粉搓)

(4)搓圓、按扁、煎、done~

2008年2月1日 星期五

禮物包


*出blog隨意門

我鍾意食crepes,由細到大都鍾意

整及post過多次,但最鍾意以下呢款

雖然士多啤梨切得唔係好靚,但好sweet咁啊

禮物包內係cream同士多啤梨粒呢