2008年9月30日 星期二

大少奶的自悠煮意生活...............封面設計


編輯見到我晌blog叫人催佢啊

我就係咁威逼佢交封面,終於有喇

但呢個仍會修改,隻色印出來時會有唔同呢!

隻色會係dirty pink




設計師畫既圖畫好得意




書封底

我誠邀(威逼) 10個 blog內好友為我寫序,佢地幾乎10個都話我係癲既

書封底cap左其中3個好友一小段

要睇晒呢10個全段友序就要..............買書喇





 <---類似咁樣色,係我鍾意既顏色呢!會淺少少既呢

2008年9月27日 星期六

蘇good


近來開始忙,除小冬婚禮同我本書就快出外
已答應一本雜誌寫專欄,本雜誌係一本受歡迎雜誌
身邊既朋友都會睇,又不斷游說所以我就答應
不過...呢個專欄會不斷定期換人,所以暫定只知道暫時會寫一個月幾期呢~


話說我係TVB迷,從來唔轉台、甚至收費電視都只會睇無線
所以一直好多人提呀蘇我都不為所動
直至而家呀蘇晌無線播,我終於都睇到,仲好鍾意睇
覺得呀蘇最好睇之處係無一定份量,跟本煮嘢係無一定份量呢!

寫書時我試過份量乜都無寫,結果...........比編輯追我補番
就快寫雜誌食譜專欄,又要寫啊!

拍青瓜..............我唔夠力加上一拍飛到週圍都係,所以拍唔夠啊
的確幾好味


呀蘇話每個屋企都會煮過洋蔥豬扒,但我未試過係第一次
豬扒我唔會煮、黑色既又唔會提起我興趣
唯獨是呀蘇教既我就試呢!的確幾好味,連唔多食豬既我都覺得OK




蕃茄炒蛋我用一路以來用開方法
因為......................火箭升空,呀蘇延播一集啊




【大少奶的自悠煮意生活】封面睇好快有得睇,我當然睇過啦!
但編輯仍有細微既嘢要執好,攪掂我先post呢

將會皇冠出版社個網頁開另一個blog,進註作家blog之列,到時再公佈吧

如果十月頭仍未見到本書

你地應該知道打電話去邊間出版社....催佢地喇(皇冠出版社附屬"青馬文化出版社)

2008年9月26日 星期五

噢!no..........


終於消滅晒罐鹹牛肉同薯仔

我咁堅持係覺得食物唔可以隨便浪費,要珍惜幸福

但同樣食物可以做唔同既味道,呢樣當然值得...........哼~~~~~~~~

呢次就整薯仔漢堡,係用薯蓉夾牛肉、裡面仲有洋蔥粒

仲可以加少少芝士,當然裡面可以揀另外餡料

如果整比大少爺的話,我唔會講裡面有乜,然後..........佢就永遠都估錯

男人係經常估錯食物既呢~~~~




由於薯仔整完外型未煎會好易爛

我放佢地入鑊時,隻手掂到鑊邊,結果.........................又辣親手~~~~~~~~

噢~~~~~~~




各位~~放心啊!

呢幾年煮嘢我都辣慣晒,唔算太痛呢~~~

鍾意上煮食係會有d犧牲

喜歡你讓我下沉 喜歡你讓我哭
能持續獲得糟蹋亦滿足
喜歡你待我薄情 喜歡你為人冷酷
若是你也發現 你也喜歡虧待我
我就讓你永遠痛愛著我

2008年9月25日 星期四

爺tart


為免個blog食滯,今日都係唔post薯仔
上次我個blog全部熱氣食物,攪到我牙肉腫2星期啊
比處死更難受

今日既係椰撻
我下星期將會好忙,忙著我"近身"小冬頭親事
加上仲有其他貴賓要招呼
所以我今日趁仲得閒少少就整椰撻比大少爺食

我本身唔鍾意食椰撻
但無辦法,我精神領袖鍾意食,我就會整

自己整椰撻好似好味d架

哼~~~~~~~~

當然我自己整唔會特別去整果粒難食車厘子啦啦啦啦啦啦啦啦啦




before baking ~ after baking~~~~~




食譜撰自為食貓

撻皮材料
牛油  140克 
糖霜 55 克 
蛋黃  1 隻 
花奶  28 克 
低筋麵粉 225 克 

餡材料
糖 150克 
水  115克 
牛油 40克 
蛋  2 隻  
花奶  1 湯匙  
椰蓉  120克 
泡打粉 1/2 茶匙 

撻皮製作
1. 牛油和糖打勻,加蛋打滑。

2. 加入花奶,再加入麵粉,搓成粉團。

3. 壓/鋪在撻模, 待用。

餡製作
1. 糖、 水、牛油和椰蓉煮至糖溶,冷卻後加入蛋、花奶混合。

2. 再加入泡打粉拌勻,雪一小時。

3. 將椰餡倒入撻模,190度焗約 15 - 30 分鐘。

我見議將撻皮雪半個鐘再入模比較好,因為唔雪的話個皮太軟

2008年9月24日 星期三

咩嚟?


琴日食剩好多鹹牛肉、又有滾蕃茄湯剩既薯仔

打完風唔想再食鹹牛肉三文治,點解?因為打完風嘛
鹹牛肉三文治係八號風球既餐單呢

餘下既材料點算呢?就整鹹牛肉薯蓉
不甘平凡既我就去整左個咁既樣既物體
佢就係鹹牛肉薯蓉、上面加小小芝士焗

點解攪成咁,我走去玩聖安度唧咀,攪到個薯蓉咁既樣

噢~~~~~~~~~




聽日預告:我仍然係整鹹牛肉薯蓉,但就唔同整法、唔同味道既

2008年9月23日 星期二

好8


今日八號風球,終於有一日唔駛開冷氣

希望天氣會遂漸轉涼,早段時間好似個焗爐咁

八號風球總會有一個八號風球守則

1)食罐頭鹹牛肉

2)食薯片 (其實平時除左食粥外,我唔會食薯片)

3)唔會再3餸一湯,必定食碟頭食物

4)一定唔可以出街,8號風球一定要留晌屋企

5)無論個風點,電視一有風暴消息,必定會睇,哈~~~~

但我仍堅守唔食其他罐頭同即食麵既原則呢~~~~~~~~




今次既風球晚餐,雜菜炒年糕、碗仔翅

我每次打風都會食罐頭鹹牛肉,今次都唔例外

只不過午餐都已經忍唔住開左做三文治,晚餐就摷雪櫃食剩餘物資

迷上食上海年糕,好鍾意好鍾意,係不能自拔地鍾意,所以我每次食都好開心

至於個碗仔翅因為我要為雪櫃清理門戶呢

好一個8號風球晚餐~~~~~~~~~~~~

2008年9月22日 星期一

大少奶的自悠煮意生活...即將出版


下晝上出版社交番份校對本
今個星期就有封面,到時我會post上黎呢

我本書【大少奶的自悠煮意生活
本書並唔係一般食譜書,係一本生活散文,內有食譜

散文部份我自己睇番,依然有笑有淚
笑既部份:各種整古大少爺方法大揭祕、生活趣事
我將自己平時瘋癲文筆,轉為書本文,都一樣係癲既

眼淚部份:係我因為爸爸化成天上星星,學獨立
學照顧自己之餘,仲去照顧埋身邊人,但過程依然係......癲既

一星期菜單,每日都有唔同款式粥、粉、麵、飯、主菜、甜品或飲品既食譜




↓本書既校對本,我偷影低幾部份啊




散文:由大小姐變成大少奶過程、學家務過程、初初既亂七八糟事

同大少爺相處(即係整蠱佢祕及,哈~)

食譜:有一星期七日菜單,包括:主菜、粉麵飯、甜品(每個食譜都有一段小散文作介紹)

節日菜單:頭盤、餐湯、主菜、甜品

食物演變法煮食小智慧

大少奶生活:有我每日唔同時間表、裡面有好多照片、有餐廳、用品、甚至玩具

送給我兩個最愛....懷念爸爸篇、同答謝大少爺篇

書中加插圖畫

個設計師居然夠膽整個雞頭晌我本書度呀

仲唔止

另外有一篇用魚肉整既,係畫左一個魚頭啊






帶蛋糕上出版社,去答謝出版社各人,亦都有見marketing,傾下宣傳計劃呢




我本書今個星期尾就落廠印刷

預計十月頭會出版,係皇冠出版社附屬"青馬文化出版社"

如果十月頭仍未見到的話,你地就知道應該打電話去邊間出版社..............催佢地喇

今個星期尾我會post封面比你地睇呢

暴民


趁Vanlily去廣州派帖
我偷佢個食譜再公諸於世
星期六呀茄生日蛋糕面層整一堆焦糖果仁,佢地好鍾意
呀茄一吹完臘燭成班就搶果仁食,搶到一粒都無淨

個蛋糕未切就已經變成月球表面


直頭一班暴民搶軍餉咁架,噢
第一個發起搶既,就係個食譜始創人............陳小冬

琴日又再整比我【精神領袖】大少爺食
佢好鍾意食果仁,有焦糖包住既果仁更架鍾意食呢




焦糖果仁

果仁 300g(隨喜好選擇果仁)
糖 100g
水 40g
牛油 10g

先將果仁略為烘焗、或先用白鑊略炒

1) 糖加水用小火煮至起泡
2) 加入果仁後熄火拌勻, 此時糖會結晶令果仁表面變白
3) 再開中火繼續炒, 直到有"拍拍"聲發出, 顏色也會開始變金黃
4) 熄火後加入牛油拌勻, 再倒於入爐蓆上, 趁熱用叉把果仁一粒粒分開
5) 放涼後便可放上蛋糕面

↓步驟 2) 果仁表面變白時,再開中火炒




2008年9月20日 星期六

官方相片


今日又係開生日會

其實壽星女想要榛子mousse cake

但我就早兩日又唔舒服,無出到街買材料

只能用屋企既材料去做

結果又係Gateau Chocolate

唔同既係…我加焦糖果榛子、合桃同腰果,希望壽星女唔會介意呢

焦糖果仁好好味啊~







2008年9月19日 星期五

飲前


大少爺早幾晚去飲宴,為免佢肚餓所以我想親手為佢個肚打底

我就預先問佢想食乜,佢話炒飯

炒飯係我既無語問蒼天系列之一,無一次炒得好

跟Annie Leong本書炒過一次係正常少少,其餘都係炒到不知所謂

所以聽到【炒飯】時我有d聽到紅姨高跟鞋既咯咯聲咁驚...........(睇電視睇上腦)

但今次居然比我炒得好好睇睇同好好食食啊!

我.......係咪發緊夢呀)))))))))))))

當然仲有湯,飯可以唔煮、湯唔可以唔煲呢




我買定包椰絲整椰 tart,大少爺成日都望住包椰絲

可惜我唔爭氣成日都唔舒服

終於諗到方法比少少椰絲佢食,就係JELLY糖




我終於可以睇到自己本書初版睇,因為已經做最後校對喇

好開心。。。



2008年9月18日 星期四

勝利


大少奶的勝利牛丸

無錯!我整牛丸粥,牛丸係我整,牛丸粥裡面既牛丸係我整既

本來我係想整頭菜牛肉粥

但經過之前經驗,呢款粥好易會整到似獲利回吐...................物

所以我整之前就諗整成肉丸應該會好d

跟住就猛攪牛丸攪至起晒膠,心諗....煮既時候應該唔會散開

結果整到彈牙牛丸,哈哈哈

碗粥配上珍珍薯片,當然好好味

唔好怪我又再次響起.............................哼~~~~~







睇下裡面既 texture,用街賣牛丸一樣、仲一樣彈牙




唔好問我會唔會整埋魚蛋、貢丸、墨魚丸........etc

我係唔會整既

2008年9月17日 星期三

非常特餐


琴日既午餐

點解叫非常特餐?因為.......................

個米粉既湯係用做節果罐烚4個鐘既鮑魚汁整

所以個米粉帶有鮑魚既味

其實我唔係一個慳既人,但我鍾意自己諗點樣可以用晒物資

當用得好既時候就會有一種滿足感

仲可以.....................................哼~~




個蛋又係扮澳洲牛奶公司炒




2008年9月14日 星期日

中秋節快樂!


各位~~~

中秋節快樂!


琴日係我同大少爺結婚週年之外,仲係迎月夜

今晚要去朋友屋企BBQ,所以我同大少爺琴晚就已經食團圓飯

下晝去完街慶祝完就返屋企整食物,其實我有訂過位打算出街食飯

但間食店限時個半鐘就要交枱,我寧願自己煮呢

雖然簡單但起碼食得舒服,我最憎限時交枱

晚餐有生菜鮑魚




罐頭鮑魚並唔係即開即食

係要慢火原罐烚4個鐘先好食,如果怕浪費媒氣就用真空煲或電飯煲烚

烚完一開就會聞到好濃郁既香味,記得係慢火




蝦蒸豆腐

原本想打蝦膠,但行完街好累,所以好懶

就咁用蝦蒸




我同大少爺最鍾意食既咕嚕肉




叭呢兩碗材料沉晒底既係花膠湯

係用杞子、紅蘿蔔、紅棗、圓肉、花膠、瘦肉煲成




飯後甜品,薑湯湯圓

係買湯圓返屋企,再用薑、片糖煮既

每次我整湯圓都一定用薑、同片糖去煮糖水,配湯圓特別好味






2008年9月13日 星期六

913


每年呢張相出現,就係代表我結婚週年又到啊

913 .........長長久久一生一世,係大少爺揀既日子

今年仲要係迎月既農曆八月十四,當然要慶祝慶祝

結婚以來我比以前更加快樂!

仍然希望再改善自己壞脾氣,可以做得更加好

最希望我同大少爺都能身體健康,到一百歲時仍然可以慶祝結婚週年紀念~




慶祝節目係一貫我倆共同興趣................shopping

至於晚餐就可以食埋團圓飯,中秋正日我地要去朋友家BBQ呢

因為好累,反而無整蛋糕比自己

但有 minicorgie從北海道買比我既士多啤梨朱古力

好好味啊





 <--好好味啊

外面香滑朱古力,裡面係風乾既士多啤梨

多謝魷魚大隻佬呢~

2008年9月12日 星期五

我會陪你嫁 @鳳城


琴日同小冬vanlily、佢契媽 minicorgie一齊去買結婚用品

唔知點解好開心,買既過程都好好笑

個結婚用品店老闆好好人,差唔多買齊上頭用品

我仲率先用上把子孫尺追住小冬打,打到佢百子千孫

仲陪佢去買結婚鞋

成晚都好開心,連我都好開心咁陪佢去買啊




睇到咁多囍字好開心啊




呢把出門既紅傘




張帖既封套都好靚,我有士多啤梨圖案

小冬契媽有汪汪啊




由設計購思、到影相、到yan姐設計我都睇過

但收到手一刻依然覺得好靚




之後去鳳城晚飯

呢間鳳城我甚有回憶,我外公每年生日都會晌呢間鳳城擺幾圍

但自從我外公化成天上的星星後我就無再踏足




蝦多士

我覺得好油膩啊






藕餅都幾好味呢




鳳城炒飯好味啊




焗西米布甸




好開心既一晚,我完全感受到小冬既sweet

雖然我同佢契媽不停去戲弄佢,但佢仍然不斷甜笑呢

好期待佢大喜日子啊!身為姊妹團之一既我,一定會陪伴著佢呢

2008年9月11日 星期四

撈埋就掂呢


琴日下晝同kathy行街,行行下佢話好鍾意食panna cotta

跟住我返到屋企就搵書睇

搵到個食譜,個食譜用熱情果做,但我無晒果蓉

結果改用朱古力試做,再將份量改量過,用64%朱古力做香濃古力味又夠滑

基本上呢個甜品撈埋就掂

我仲將用剩朱古力刨碎灑上面,雪凍後面層有朱古力脆粒效果

感覺似double chocolate咁

噢~我個朋友鍾意食咁易做既甜品,咁我要次次整不同味、整到佢食厭為止

哼~~~~~~~~~~~~




食譜:朱古力味 (經改良)

材料A

黑朱古力 35g ~50g (視乎用既古力濃度,我用64%)

忌廉  25g

材料 B

忌廉  75g

奶     75g

魚膠片 4g

糖    25g

做法:

1)將魚膠片浸凍水軟化

2)將黑朱古力座溶,加入(材料A)的忌廉一邊煮熱一邊攪勻至幼滑備用

3)將(材料B)忌廉、糖、奶煲熱,但唔需要滾,加入浸軟魚膠片直至魚膠片完全溶化

4)將做法2同3混合、攪勻入杯、放涼入雪櫃雪凍

若想加入朱古力碎可以刨朱古力、晌奶凍放涼後加上面再冷藏

如果用果蓉整生果味,就只需要30g果蓉(唔駛加忌廉),隔水座熱佢再加材料B

2008年9月10日 星期三

大少爺恩物


早前我病到無精打彩,當然照顧唔到大少爺飲食,佢要食飯盒係難免既事

我經常聽到佢話要買排骨飯,係鳳爪排骨飯

佢食得好開心咁既樣

佢同我一樣已經唔多食豬肉,排骨飯算係佢唯一自選既豬肉飯類

當然我好明白佢係對淋上飯面甜豉油有興趣啦

我決定要自己整排骨飯比佢食,呢個無難度既飯當然能討佢歡心

起碼屋企既甜豉油佢可以自己加

最簡單方法整排骨飯,將煮好晤飯加上醃好排骨放落鑊蒸至排骨熟透



用飯煲煮飯時,水滾起放醃好排骨煮至熟透

Q&A

知唔知排骨飯最重要係乜?




答案:

係粟粉!

將排骨醃好,臨蒸前加粟粉撈勻就可以做成滑滑口感既排骨啊