2009年6月29日 星期一

遲來的


遲來的戚風

7、8月都無乜紅日,表弟先生成日提醒我整戚風

但我要晌我仍然得閒既日子去整更多想整既食物

所以一直都無整

直至今朝我先的起心肝整個伯爵橘子茶戚風

哼~佢甩模甩得令我滿意啊




2009年6月26日 星期五

等風?


琴晚晚飯途中,菇奶奶話將會打風
然後....佢地又問係咪我整過戚風或者叫我快快戚風
答案:係無既

不過…到而家我都無乜留意過風暴消息
而係覺得michael jackson有點可惜!
我今朝接近6am突然醒一醒,習慣開收機聽住903瞓既我聽到發仔講呢個消息
矇矓間諗:係咪發夢呢?
之後瞓醒就知係事實,無耐前仲聽到佢復出架嘛!

遲左食lunch
今日既午餐係:奶油菠菜焗帶子磨菇薯蓉近來我瘋狂愛上既食物除左西瓜、仲有菠菜啊




before baking

帶子只係帶子粒,晌吉之島賣$40一包,唔係最細粒,但又唔係最大粒

都幾抵食,放定晌屋企煮意粉用都唔錯啊




奶油菠菜食譜

材料
菠菜  1斤

奶油:

淡忌廉  100g
雞湯  80~100g
麵粉  1.5湯匙

做法:

1)菠菜洗淨,放滾水煮1分鐘,放入冰水冷卻(此步驟保持菠菜既深綠色唔會焗到變黃)

2)菠菜榨乾水份備用

3)先落油,慢慢加麵粉炒,炒至麵粉輕輕吸油後,遂少遂少加入忌廉,炒至成為成為膏狀

4)遂少落雞湯炒,邊煮邊攪,直至落晒雞湯,不停攪至融合及無粉粒

5)煮至理想杰度,如果過杰或覺得唔夠汁可以加雞湯、如果唔夠杰就煮多一陣

但要淋上菜面焗既話,杰少少好d

6)淋上菠菜面用220度焗8~10分鐘,可以加點芝士

*唔加鹽係雞湯有鹹味會越煮越濃,可以先試味唔夠味先加鹽

*炒麵粉好易起粉粒,所以每樣材都要遂少落,邊炒邊攪

2009年6月25日 星期四

菇奶奶壽宴@泉章居


今朝起身就去剪頭髮,其實我好鍾意個髮型
不過…就短左dd呢

跟住就晌屋企悠悠閒
然後…就又悠悠閒去化妝
再悠悠閒出去
再然後…出席菇奶奶壽宴

今個六月餓底 Hungry eleven夾唔到時間gathering
所以改為晚飯
但都有會員缺席
今次得番我、vanlily、笨B媽媽、呀茄、呀飛E、mini、tan tan、同主腳菇奶奶
噢!好彩七月起碼見兩次

壽宴地點:旺角泉章居

菇奶奶生日,當然要送厚禮
我送一隻限量版既鑽錶比菇奶奶




然後開餐!




當然要有雞、有魚(芝士魚)、有蝦、有煲、有菜、有豆腐、有乜乜物物啦




原本打算食棉棉冰,但太多人,改去發記,哈!影得自己碗楊枝甘露




生日蛋糕:餅神出品既...........焦糖香蕉芝士蛋糕!

裡面夾有香蕉,仲有招牌焦糖醬

無得頂啊!菇奶奶見到個生日牌想喊咁滯啊




生日禮物:Hungry eleven新會規.....【月餅會】

生日主角自己買禮物,然後會員夾番錢

當然有個上限,um.......上限係4位數字

你買乜都得!大家都開心既會規啊

Hungry eleven解作11個餓底組織既會員




菇奶奶生日快樂!祝你每日都快樂!身體健康!

2009年6月24日 星期三

大對比


近來所有人約我無論行街或食飯,我都約為夜晚
變相煮晚餐既次數又減少
所以整小食比大少爺去補償下

之前Gathering繼姐鄉下人佢整一個釀青瓜
大家都覺得好好味,都心郁郁想試整
但太忙,一直都心掛掛

而家起碼有1個月下午我會得閒,可以試下
大約7月後又開始我既忙碌,到時又唔得閒整

整之前問繼姐,繼姐話:呢樣野係搵自己笨,舂蝦米舂好耐架
然後我問:吓?攪拌機得唔得?剁碎得唔得?用搥仔得唔得繼姐都只得一個答案:唔得

So......CC地氣去舂蝦米
不過..值得既

繼姐話撈麵.....伴凍豆腐.....甚至做泰式柚子沙律時下一些.....都很好吃....

其實我覺得配溫室青瓜最好味,一樣食物有惹味與清新

真係滿足所有願望啊






分享食譜如下.. copy鄉下人

材料

蝦米 1杯

乾蔥頭 8粒 (切成茸)

指天椒 1-2隻 (切幼圈, 若不吃辣的可減去)

調味料

砂糖 3 湯匙

魚露 2 1/2 湯匙

3-4茶匙 xo醬 (原食譜是用 3-4片 揸碎身的咖哩葉, 我買不到咖哩葉, 所以用 xo醬取代)

青檸汁2湯匙

做法

1. 蝦米洗淨, 浸水半小時至1小時至軟身, 吸乾水分, 舂成蝦鬆狀.

2. 鑊下1/4杯油燒熱, 下蔥頭茸爆香, 再下蝦米鬆及指天椒, 炒 3-4 分鍾至小許微焦及散發香味, 最後下調味炒勻成醬.....即可.

3. 將溫室小青瓜扢去種籽, 釀上蝦鬆醬, 即可享用

2009年6月23日 星期二

多個人的


一係好熱、一係落大雨,到底揀邊樣好?

今朝11點15分,Fiona打電話比我,話晌樓下停車場泊緊車
無啦啦通知我一聲就上到我屋企,仲好多謝晒咁買麥當當雞翼上嚟
然後上到我屋企坐一陣食埋午餐,又一陣風咁走

到底....佢上嚟做乜?

到1pm又輪到鐘點姐姐上嚟,否則我知道我實會同fiona出街

我有整嘢比Fi食,係迷你pizza,迷你到好似一塊餅咁
無計,我冰格塊麵糰得番咁多多,做薄既脆批
加上磨菇、芝士都夠做4件

煙三文魚焗好後先鋪上面




加埋沙律同外賣雞翼,就成一份午餐




最後仲有西瓜

早幾日好熱,經常覺得好口渴
飲完可樂都仲係渴,結果食西瓜後終於唔再渴
今個夏天咁熱,西瓜將會長註雪櫃




2009年6月22日 星期一

表表~~


表弟先生同表妹小姐上我屋企
我當然好樂意煮嘢比佢兩個食

知道表弟先生同表妹小姐既口味
所以就整佢兩個喜愛食物

5pm開始就食,食完一樣先一樣,因為全部都靠焗爐呢

食完抖一抖再食,都食成個幾鐘啊

頭盤:parma ham w/Hami melon,我哋係一家人,都一樣鍾意parma ham




呢隻Rosemary牛油洋蔥焗雞,非常滿意

滿意到今星期日打算再整比啤膠女工食




用牛油炒香蒜蓉、香草、黑椒、法國鹽花,炒至出味

再搽勻隻雞醃一晚

再用大量洋蔥、紅蘿蔔、做stuffing

焗盤放滿紅蘿蔔、洋蔥,焗既中途用番流落焗盤既汁淋上雞面

隻雞就唔會焗乾之餘,仲會有紅蘿蔔既甜味同洋蔥香味呢

↓黃色一塊塊係經過雪凍既香草牛油,鋪番上面焗呢




裡面都有好多紅蘿蔔與洋蔥




pizza

用salami、磨菇、茄醬已經好惹味啊!

無買Mozzarella cheese,下次一定要記得啊




奶油菠菜好好味架!呢個真係好好味




仲有又係心太軟!哈!我連影佢相都唔想,求其影就算

仲要佢地連杯食添啊




多謝餅神既蛋糕!最驚喜係每個puff都有榛子吉士

表弟先生、表妹小姐都讚不絕口啊




我覺得煮嘢比人食係一種享受啊

2009年6月20日 星期六

努力~


聽日父親節,9年來父親節前後我都會情緒低落
今年父親節除了一貫去"Visit"老豆之外
仲會有表弟先生、表妹小姐陪我渡過

母親節我地三個一齊渡過、父親節都一齊過
但佢兩個比我幸福,佢兩個既爸爸(即係我bear bear 舅父)只係返加國定居
而我爸爸就化作天上星星...........................

預備表弟表妹到訪既晚餐都要花上一日去買材料同埋煮

有1個頭盤、主菜x2、一碟蔬菜、仲有2個甜品

甜品....係心太軟,應該係話又係心太軟,無計,表妹小姐想食呢

另一款係我誠邀餅神為我整既栗子puff蛋糕

好多謝Vanlily百忙之中都幫我整,我表妹鍾意食栗子,我又無信心整得好

所以誠邀餅神為我整,Vanlily......多謝你啊

今日去拎蛋糕,只見到5分鐘唔夠就要走,上到車我偷睇個蛋糕!噢!

實在睇見都興奮呢




講到呢度,我要再努力

努力去預備聽日所有食物

努力地生活,爸爸活晌我心裡面,直到那天再重遇

2009年6月18日 星期四

delete


delete

150?


出呢篇blog時我已經去左vanlily屋企做女工

今日輪到我去做女工,心情有點緊張
因為呢個係vanlily既大project

到底150係乜?做乜?

我其實最主要去做煮下午餐、做下QC

製成品↓





呢度係早幾日四個女工友負責既!哈!好彩避左呢part呢




到底乜野係150?

已經去到喇.....




認得個標誌嗎???






今日去做乜?有乜午餐?芝士焗磨菇、菠菜汁帶子天使麵


 


阿飛飛買既雪糕, 好叻架佢!!!!!!




點慶功?待續!

2009年6月15日 星期一

辣唔辣?


星期六大少爺牙肉發炎,塊臉腫左一邊臉
表弟先生到訪,大少爺都無晒心機
連晚餐都只係自己一個食粥、食菜

幸好!經我一輪清熱攻勢
哼~~~~`幾個鐘後開始消腫,大少爺又回復心情同表弟研究濾水器

無錯!我既清熱攻勢換轉用晌女生身上
一定會暈低呢

原本想晌星期日既晚餐上花點心思
攪下新意思
But........唔敢輕亂來
牙肉痛好慘啊!萬一再腫過就弊,所以只能煮清清地既晚餐呢

蒸青班!哈!大少爺放假洗魚工作由佢幫我呢

我同大少爺去揀魚時,條魚游來游去

賣魚姐姐同好好心機遂條問:係咪呢條?呢條呢?呢條?哦~~呢條




其中一味餸要分開兩碟,呢碟係大少爺既西芹炒帶子




呢碟係我既Xo醬西芹炒帶子,我唔敢比大少爺食xo醬

唯有分兩碟啦!




牙肉痛既妙藥,芫茜皮蛋茶瓜魚片湯

上次我牙肉痛飲呢個湯好番,而家有乜風吹草動都煲來飲!




漏左講:
當晚我望住大少爺好無心機既樣,又食唔到野
我就問表弟:如果哥哥食唔到野,咪會好快好瘦,瘦到變一條滕?表弟先生答我:唔怕!你不停比汽水、朱古力、雪糕佢充肌,全日只食高卡路里食物就可以
哈!好彩大少爺好番

佢唔鍾意食古力同雪糕架!



2009年6月13日 星期六

唔該晒!


今日熱到暈低啊!
下午同vanlily食lunch,行一陣都已經熱到我兩個暈低咁滯

趕返屋企,剛好表弟先生都差唔多到達我屋企
哈!唔該晒表弟先生幫我整電腦
除左幫我加ram,仲幫我用吸塵機吸機箱內既塵
原來裡面好多塵啊!風扇位積滿塵




晚餐只係好簡單,加上大少爺牙痛要另外食粥
所以我無整好多食物比表弟先生呢
不過好多甜點,表弟先生同一樣鍾意食甜,我預備甜點比表弟帶返屋企食

串燒




紅酒烤肉眼扒




表弟先生話想食好creamy既pasta

佢同我一樣鍾意食扁意粉




仲有表弟先生最喜愛心太軟,用杯裝比佢食

下星期又整喇!表弟先生同表妹小姐一齊再上我家

表妹小姐又係好鍾意心太軟呢




又去買mochi cream既甜點,買朱古力香蕉味比表弟先生

我既宇治金時、大少爺要黑芝麻味




哈!仲有仲有餅神vanlily整比我既macaroon

好多人話macaroon唔好味,但我偏偏好鍾意

餅神呢款好味啊!因為杏仁粉靚,所以有微微既杏仁香味

繼Joel既果味macaroon外,呢個我都好鍾意

比左一半份量表弟先生帶番屋企比表妹小姐食




餅神送既玻璃曲奇,表弟經常想試

但我無時間,所以餅神整比我地呢




表弟先生同表妹小姐下星期再黎,我一定整得更好更豐富呢~~~~

舅父、舅母、Hello~~~~~~

你看到嗎?我會填飽佢兩個既肚皮呢

2009年6月12日 星期五

幾多成熟??附心太軟食譜


我最怕既甜品係....心太軟
驚既原因係因為有段時間表弟上親我屋企都話要食
導致我同大少爺都怕

然後....經常出現以下對話:

表姐:你今個星期上我樹想食乜啊?
表弟:想食乜啊?無喎!
表姐:無?點都講樣丫
表弟:咁....心太軟
表姐:..................

再再然後:
表姐:你今個星期上我樹想食乜啊?
表弟:想食乜啊?無喎!
表姐:無?點都講樣丫
表弟:咁....心......
表姐搶答:咪駛旨意心太軟呀

再再再然後:
表姐:你今個星期上我樹想食乜啊?
表弟:如果有心................
表姐搶答:唔要呀!唔要呀!你咪再話心太軟喇喇喇喇喇喇喇

不過總有例外既時候,例如....我要整電腦、要整魚缸、要加ram.....etc

聽日我未必夠時間,今日整定先

焗一個試下晌杯邊搽一層牛油,撲少少高粉,果然易甩模

心太軟同牛扒一樣,每人要幾多成熟都唔同

表弟先生要5成、我要7成、大少爺要全熟

正正同食牛扒既熟度一樣
But.........牛扒易控制,心太軟唔由我控制

係由焗爐控制的

食譜:

黑朱古力         85g

牛油                 85g

蛋白                 1.5隻

蛋黃                 3個

糖                     3湯匙

麵粉                 3湯匙

裝飾糖霜          少許

做法:

梳乎厘杯杯底放一張牛油紙、杯邊掃一層牛油溶液

1)黑朱古力及牛油各自座溶,然後混合成朱古力漿

2)將蛋黃、蛋白、糖混合打勻至淡黃色,加入朱古力漿拌勻

3)篩入麵粉拌勻

4)朱古力麵糊倒入已掃牛油及已墊牛油紙既梳乎厘杯中、入雪櫃30mins

5)食既時候放入焗爐180度焗10~13分鐘,需視符火力

貼士:

可以睇下個蛋糕表面如果剛好凝結後焗多2分鐘

每個焗爐火力唔同所以要自已判斷,焗得太耐會變實心





Vanlily舊blog消失空氣中

唔緊要

新blogClick here-->http://hk.myblog.yahoo.com/vanlilychan

Vanlily同rock n roll 一樣..Never die~~~~~


2009年6月10日 星期三

加冕


Hello~~~~~~

今日點都要睇實塊happy farm

天氣熱真係要唔好出咁多街

琴日無帶粉盒,晌車又好大雨,我不停去諗如果把傘爛左容乜易落左妝呢?

落妝唔緊要,但落到一半咁點算?

到有太陽好熱,咁個妝又溶晒?

無錯!天氣熱令我腦內既災難小組啟動

是日曲奇日,我要整曲奇比好多人食

琴日又再去買熱情果茶同另一隻伯爵茶

我始終覺得熱情果茶個味好d

之前同vanily去街見到呢個曲奇模無打算買
後來.....諗諗下又買左
正正適合我用
因為.......................
聽日我會上出版社,用呢個模整曲奇係咪好適合先?




2009年6月9日 星期二

內外滿足


今日呀烏G同呀茄半日安
當然係為食下買下咁啦

由初初食花盃日式既鐵板燒

之後去行CWB買少少嘢

去金都陪烏GG訂請帖信封、再去睇下結婚用品

再之後先係戲肉,3個女人沉醉晌衫同鞋之中

然後...每人都有戰利品好滿足

再再然後諗晚餐,出血後都打算食平嘢

再再再之後食甜品!個身體無論內外都好有滿足感!正

以下4張都係之前影,今日無影得咁多




師父今日仍然有整個多士小食比我地呢




2個鵝肝set,一個銀鱈魚set

每個約$250

前菜




呢個銀鱈魚煎得非常好味啊

仲有個蝦無影到




鵝肝!外脆內軟




牛柳粒,好淋

正!




薄燒牛肉卷

裡面有香蒜同蔥粒




炒飯




每個set都有抹茶cheese cake




當每個人都有戰利品時,心靈上既滿足真係好充實

充實到晚餐求其食都得




我同茄都要天婦羅定食




烏G要牛肉卷定食




烏冬既湯底都要粟米湯呢




哈!全日都無甜品唔算圓滿

又去"糖仁街"食雪花冰啊

呢個係唔記得咩名,但係咖啡酒加椰子

係一個冰兩種味




仲有芒果味

噢!一樣都好好味呢




好開心既一日,但今次爭呀妹呢~~~~~

Facebook又有新衫睇呢~~~YEah!!!!!!!!!!!!!!!!!!!!!!!!!!!!