2009年11月30日 星期一

午餐說:你好嗎?


一個人的午餐回來了~~~~~~

新書既食譜做完喇!本書都七七八八喇!

個心終於都可以放鬆少少,雖然仍要處理家人既事

但係本書最擔心既一part都做完,已經舒服好多

今日可以攪一大爛餐去整lunch

我享受.......

攪一大爛餐既感覺啊

攪一大爛餐既過程

攪一大爛餐既午餐係好開心架

一個人的午餐..........蒜蓉蒸蝦糯米飯!哼~~~~~~~~~~~







2009年11月29日 星期日

O咀


今日返教會崇拜完後,就約呀茄同事頭婆晌TST

目的係陪呀茄睇一睇晚裝,然後打算只行—陣就算

我同事頭婆一樣晌12月生日,所以一齊去1881間Tiffany互相揀生日禮物

然後互相送生日禮物!哈~~~

買完後打算去食個tea,點知......................

唉......好似發一場夢咁

唔相信係事實,但明明係事實

一行三人行入去呢間晌海港城某間開放式cafe時

所有waiter同waitress你眼望我眼,十問九唔應兼黑臉

每份tea set $68連飲品一杯,飲品我無影相,因為無心機去影

呢件係呀茄揀既椰子菠蘿mousse,都算過得去




呢4件係我同事頭婆既tart,落order時無人問過我哋揀乜

然後又唔比多隻碟我地去share,兩個人四件餅逼埋一碟

服務都已經唔好

呢四件我都唔知點形容

左一、檸檬撻,上方古力puff、右一raspberry tart、下方榛子puff

最奇怪係....四件都雪到好硬,裡面無論係吉士或cream都係硬到好似雪糕

又凍又硬

我懷疑好耐到底係咪雪糕,佢做乜雪到硬晒架?

但佢絕對唔係賣雪糕




到走埋單既一刻,個waitress拎張單埋來,連幾錢都唔講

拎住張單企晌度等我哋比錢

到底發生乜事?明明間cafe都係幾骨子架,點會咁架?

2009年11月27日 星期五

沙煲@勝手


唔好意思!又要預備做食譜,做埋聽日就完工

今日要預備各樣嘢

又要逼你哋睇"DC拍攝外食篇"啊!多多包涵

早幾日五個敗家女人去出戰
事前講好,留錢買嘢,食就食唔要花太多錢
所以當時去burger room
burger room隔離有間食shabu shabu既店子"勝手"
店子細細,但都幾精緻,令到呢5個敗家女人企晌門外有點心動

指手劃腳一輪就行去burger room

然後....食完漢堡包再經過,又對住呢間店子指手劃腳討論一番先行開

琴日我就去試呢間吸引既小店子喇

其實我係出去搜購食材做食譜
跟住約個朋友出去食
噢!我相信呢季冬天,呢間店子會成為我最喜愛食店










呢個豚肉+牛肉只係...$98

晚餐呢個既話....要幾倍價錢




我要呢個海鮮,只係$178

晚餐既話呢個$260




樣樣都好大件呢




朋友揀sukiyaki湯




我要魚湯,好香魚味,好鮮甜




豚肉加牛肉餐,仲有串燒

可以自己揀既,要燒白鱔

佢好好味,最後忍唔住叫多一串添




好滑烏冬




包汽水




仲有甜品啊




噢!我睇完再想去食啊

2009年11月26日 星期四

秋湯


過埋今個星期,新書食譜就攪掂
我就可以放鬆dd咁多多
因為仲有好多嘢要做

起碼都可以照顧家人多dd

又可以自己煮多dd晚餐

唉....今年由年中至年尾,好似發生好多事,自己家人啦、朋友家人啦

我家人件事都未解決,令到我同大少爺都好多計劃都擱置
不過都係d吃喝玩樂既事,擱置都未係好可惜

但每件事過後都會發現有所領悟,都係學習既契機

咁樣去諗,就唔會覺得太悲涼呢

好!話說回頭
秋天我好鍾意煲南瓜栗子湯,仲要加牛蒡
條牛蒡係蔬菜盒內最後一樣食物
我立志用來煲湯

呢個湯有南瓜、栗子、牛蒡、合掌瓜、紅蘿蔔、粟米、蜜棗、瘦肉
煲出嚟好甜
秋天好鍾意飲呢個湯呢

P.s呢幾日熱返,仲要有潮濕既感覺!噢






2009年11月25日 星期三

無題


琴晚...

有5個女人(茄、烏吱、繼、事頭婆同埋我)走埋一齊

目的只有一個.........就係買、買同買既

飯前買衫買鞋,飯後當然要黎睇睇Tiffany
有一個場面係....一班女人晌Tiffany,研究個鍊咀
個鍊咀係$1400系列,但好抵好抵仲有一粒小鑽石既款式
(哈~詳細唔講,怕被搶購一空呢)
我地圍埋睇,當各人心動想開口買既時候
個sale好冷靜咁講:呢個款無晒貨無晒貨,呢條係display唔賣既


當時…

一個既表情係歎息

一個既表情係落寞

一個既表情係怨恨

一個既表情係.........."好彩咋!慳番!

雖然呢班女人立志要買買買
但食晚餐卻諗一間實惠既地方去食,錢都留番買買買上........(我又係勝利者啊)係burger room,一個無乜可能一啖咬既漢堡包
晌加路連山道
佢味道都唔錯啊!




好大漢堡包




我、繼姐同事頭婆都要大磨菇漢堡,好香啊




食半個,有半個要包起拎走呢




呀烏吱同繼share既鵝肝漢堡,塊鵝肝好厚下呢




洋蔥圈




芝士薯條




請容許我有感而發.....................

今日收到朋友一個唔開心既消息
大家心情都沉下去
只希望我所愛的朋友,要堅強去面對一切
人生畢竟要繼續

人其實可以掌握既好少,可以掌握財富、掌握權力
以為咁就係掌握得多?掌握得足夠?
但人係掌握唔到生命

願神看顧我所愛的朋友,去勇敢面對眼前既低谷

祂是慈悲的父、賜各樣安慰的上帝。
我們在一切患難中,祂安慰我們  ( 林後:1章3~4)

2009年11月23日 星期一

黑仁


噢!上次去JW食 tea buffet,食到塊燕麥果仁曲奇
我同呀妹diana都覺得好好味
然後..我兩個雙眼發光

佢係脆曲奇,唔係軟曲奇

噢!今日比我整到有80%似既曲奇啊

用合桃、杏仁、杏仁粉加燕麥既曲奇

然後…用黑糖去整既

塊餅用黑糖會深色,今次唔關個爐時,呢個色係剛剛好呢

大少爺都好鍾意呢款曲奇呢!哼~~~~~~~~~

至於果20%唔似既係.10%我無落玉桂粉、10%無加提子乾啊

至於後面兩個無花果.......係唔關事既

因為今星期係...情若無花不結果感謝週

要完結先見佢唔到架!




食譜:

牛油   50g
黑糖   30g
蛋     半隻
高粉   25g
低粉   25g
燕麥   50g
合桃   20g
杏仁   20g
杏仁粉 10g

做法:
1先將合桃、杏仁加焗爐150度焗至香脆,然後放涼後整碎
2牛油放軟後同黑糖打成勻
3.加入蛋打勻
4高粉、低粉、杏仁粉篩入蛋糊內
5加入合桃、杏仁輕力攪勻
6放入已預熱180焗爐焗20分鐘

2009年11月21日 星期六

週末愉快~~~~


噢!今日我、大少爺、表弟先生既下午茶

煎鵝肝無花果沙律配黑醋汁

買到好甜好靚既無花果超開心,無花果晌呢d時候較易買到靚既呢

琴日兜兜轉轉地買到以下既鵝肝同無花果

新鮮無花果既鮮甜味,係會令人覺得好滿足既呢

可能來緊既幾日都會有新鮮無花果出現

來緊係情若無花不結果感謝週~~~

哈哈!週末愉快~~~~~~~~~~~~~~~~~~~~~~~~




2009年11月20日 星期五

@ Agnes b


前日先同烏吱佢哋敗家,琴日又再出去

放自己假去約Fiona行街食lunch

好耐無約佢咁啊!無法啦!我唔係忙有事既家人、就係忙本新書

再唔係就佢得、我唔得!我得、佢唔得

好難得大家都有時間

好耐無認真去行Sogo,明知感謝週會 people mountain people sea
初時我係想去bobbi brown 但插針唔入
去ipsa見到送乜乜物物又係插針唔入
全個地下最通爽係唔關事既Tiffany
再上七樓睇LC,又係堆滿人

去Agnes b食 lunch










個包包都唔錯




磨菇沙律




我要,個香草牛油汁都幾好味,塊牛都唔錯




呢個係忌廉汁燒劍魚,呢個都唔錯啊




甜品:我要栗子蛋糕、朋友要香蕉mousse,都ok既




陳豪 cuppuncino




個Drink list有花果茶,但我怕再度沐浴中既感覺

So......要凍檸檬茶




知道 time square有幾米時,都好想影

我好鍾意幾米,最鍾意月亮忘記了

幾米繪本好靚,似童畫書,但故事感覺都有一絲傷感既

無錯!我就係鍾意呢個感覺,世上那有似童畫既故事呢?




最愛既月亮忘記了










2009年11月19日 星期四

息息相關


以下的內容是我與你都有關的,是酥皮

你以為酥皮與你無乜關係

哼~~~~~~~~咁就錯喇!

晌秋冬乾燥既日子,稍一不慎、稍一忘記,手腳便會出現................酥皮

你唔信...試下濕度低時唔搽cream,就會出現酥皮啊!

但都並非壞事,因為對腳好鬆脆嘛

以後見到朋友皮膚乾燥就可以講:丫!你都好鬆脆喎

哈哈哈哈

原來用酥皮整蝴蝶酥,唔可以按實酥皮,摺疊時要預留空間呢!




2009年11月17日 星期二

估佢唔到


哈~今年十一月無得頂!
應該係........最熱既11月
亦都係...........最凍11月

呢幾日忙之外,就係凍

早半個月,我買一堆新衫,好希望好凍

以為會去旅行過好凍生日,但因家人既事無法起行

有D失望,但家人為先無辦法

但估唔到咁快有著得

早前我買一件fashion版既羽絨,仲影埋相上fb著唔到望下都好

買既時候係打算晌過完年既歐洲之旅著既

但聽日就已經可以著出街,11月中就著得,真係估佢唔到啊

呢個雞肉漢堡都估佢唔到,因為呢....我希望做到佢係一漏心芝士

點知...買錯芝士,焗完仲結實地與雞肉緊緊靠在一起

我估佢唔到~~~~~~~~




丫!今日後到Oisix send比我既email

18號前落單訂蔬菜盒,晌備註Campaign Code欄填入活動代碼 Yahoo! Blog
就有折啊!平2000yen
名額 20個

如果想買都仲趕得切,平2000yen即係平hk$170

再再如果新登記會員又平1000yen

咪即係3890yen就買到?

噢!又一估佢唔到既優惠!平成3000yen夠大少爺夾30次公仔啊



2009年11月16日 星期一

???


話過要用日本蛋去整蛋糕

我思考幾日之後,決定整戚風蛋糕

只有呢種蛋糕先能將雞蛋香味發揮得淋漓盡至

當我拎起隻蛋打落隻碗時...........

心諗:日本蛋裡面會唔會有d唔同既呢?例如會有個金幣、有鑽石等等


點知……真係有

大家請看下圖,見到有一粒細小既圓型物質

佢又唔係孖蛋黃我用牙簽篤佢,佢有d彈性、篤得入但唔會穿

到抵係乜?我諗一粒未發育既蛋黃,表面有d點點

會唔會係日本整蠱人既電視節目放左粒鏡頭?用隻蛋去測試人反應?

早知係咁化定妝、換件衫去打蛋啦!




製成品,真係多一份蛋香,um.......總之好味d




當認為美好既,就會美好

當認為唔美好既,就會唔美好

咁每樣事用美好角度去諗,就會所有都係美好既呢

2009年11月15日 星期日

飽暖思........


噢!終於凍啊

不過…落雨呢

冬天著得暖暖、瞓得暖暖,就會感覺幸福

飽暖思..............................................幸福  (哦!你鹹濕,我知你見到頭幾個字諗乜)

我買個Lc煲仔,無非係為整煲仔飯

用呢個煲仔整煲仔飯,真係有煲仔飯既香味

因為會多飯焦啊

菇菇雞飯!個菇係蔬菜盒內既新鮮菇呢




趕稿中~~~~~今日只能寫幾句呢

2009年11月13日 星期五

玩煮飯仔


琴晚依然無煮飯,近日我忙到爆
琴日上最後一課初信裁培,然後又見到菇奶奶15分鐘
心靈超滿足咁返屋企

今朝一定要煮,煮定今晚,天氣轉涼煮定煲仔菜

又為新書食譜而忙,加上我要去做gym

所以今朝要煮定呢

我呢.......買到個LC煲仔喇!今次唔係橙色,係紅色
原本想買藍色,但mini話藍色唔襯我?!
買最細16cm既煲仔連蓋都係 $618,係 try me價
咪睇佢得16cm,但容量都幾多

今日Sogo有粉紅色發售,鍾意既就 go go go喇!

其實我買來係煮煲仔菜架!煲仔飯用呢個size都fit呢

新紙坑煮定乜呢?係.........味噌野菜豚肉煲

係用我晌Oisix訂既味噌+豚肉野菜包整既,連灑上面既都係日本長蔥

一個蔬菜盒有多樣用途既菜,其實煲內仲有日本蘿蔔仔呢

再加上豚肉

不過..豚肉只係吉之島貨式$40




呢盒都係晌Oisix訂既,佢好味噌既味

即係唔係死鹹,你係食到味噌既味




呢個野菜包啊!想當日我晌Oisix個網.......無啦啦比佢吸引住

入面有菇、蒟篛、紅蘿蔔、筍絲,一包倒落去煮就得喇!方便




呢盒唔關事既豆腐,係亞蘇介紹既,晌city's super有售呢




講咁耐,我今日既早餐.....日本蘋果,係黃蘋果

我其實初初諗,會唔會好酸架

事實証明,黃色唔係代表佢未熟

呢隻好爽甜架呢

(我專登灑水上蘋果面影相,因為我見賣生果阿姐都係咁樣,哈哈)




多謝收看~~~~~~~~