2012年4月30日 星期一

疊疊樂~(附焗薯皮食譜)


Hi~聽日又放假啦
我心情的確興奮,因為大少爺又可以陪我吃喝玩樂
星期日崇拜間好大雨,大雨到個天好黑
但轉眼間…天晴!上帝無應許天常藍,但風雨過後既雨後陽光一定好燦爛
自從出camp後心情好好
經常都晌開心狀態,所以更有領悟呢

琴日突然想焗薯皮,早個星期下午經過部電視見到焗薯皮疊起去焗
感覺幾好
但其實材料步驟都唔入耳

於是用左個實好食,唔會出錯既做法
日式意粉醬,佢有茄肉,酸酸,除左整意粉,我好鍾意用佢整乜乜物物呢

你睇!個薯皮真係好好味呢!

哼!

*唔知點解,每次我見到薯皮就諗起...........我uncle成日話:打仗時食樹皮架咋

我總會將薯皮同樹皮mix埋去諗

唔知會唔會有朝一日我走去焗芝士茄醬焗樹皮呢?噢~唔好啊))))))))))))))))))))))))))))))))))))))))))))))))))))))




食譜:

薯仔     4個

日式意粉醬    半包

芝士    適量

做法:

先將薯仔洗淨抹乾打直切皮連肉部份,唔好切太厚,然後加少少牛油放入焗爐用200度焗10分鐘

跟住似疊疊樂咁砌,一層打橫、一層打直,每一層都搽上醬汁及芝士

再放入焗爐,220度火焗15~20分鐘,完成後灑上脆煙肉粒及蔥粒

*薯仔最好用美國焗薯,皮會較厚,但我買唔到,用普通薯仔便可以

*唔用意粉醬可以用沙律汁,或者整一個吞拿魚沙放落薯皮都會好食





2012年4月27日 星期五

1(附卡邦尼意粉食譜)


如果我唔出街既話,真係好鍾意煮午餐

煮午餐同晚餐既感覺好唔同

煮晚餐係希望煮大少爺鍾意既菜式,希望佢食得開心

而午餐係我自己鍾意既,令自己開心既

又可以打開雪樞櫃睇下有乜可以整既,可以令滿足自己煮野既快感,又好似好隨意

大少爺返工時,係我既自由空間

所以我安排同朋友見面或者去event等等,都唔會去足5日

總會留番最少一日比自己

雖然我未去到會開支紅酒、聽古典音樂、開個膽機聽水滴聲

但至少我享受下午,點著香薰、飲利賓納、睇電視同打機!哈哈

今日又煎帶子同Carbonara 意粉

重點係意粉唔係帶子,帶子只係早幾晚煮剩幾粒,同樣煎法

個意粉自己整carbonara即係卡邦尼意粉,正宗做法係唔加煙肉,但我覺得唔加又單調得滯

做法簡單得美味!哼

汁:

淡忌廉  100g

洋蔥      4份一個切粒

煙肉     2片

芝士粉    適量

蛋黃        1隻

黑椒        少許


做法:

意粉先煮好過冷河,唔好煮得太淋啊!

爆香洋蔥、煙肉,加入意粉兜勻,加入淡忌廉、蛋黃快手兜,再加少許黑椒、芝士粉,如果唔夠鹹味可以加少許鹽,但通常都唔需要

兜勻後上碟

加忌廉後趁未滾加蛋黃,否則太熱會令蛋黃熟了,做唔到醬汁效果~





2012年4月26日 星期四

摩囉


Hello,又係我

呢兩日夜晚先出現,因為我好勤力去煮飯

琴晚諗…到底今日煮乜呢?無錯!我希望每日都有新鮮感比大少爺

或者因為自己都好喜歡新鮮感

其實我成日買衫買鞋買乜買物都係想有新鮮感.........之嘛

今晚當大少爺見到我晌廚房拎碟摩囉雞飯出來時,個樣好開心

我就係鍾意佢呢個表情,係都要攻到佢出現呢個表情

希望即使唔係日日都隔日有呢個表情

然後有一日整碟好肉酸既菜式等佢降溫,再突然整d佢鍾意既,又出現呢個表情

我覺得自己好似變態佬,哈哈

今日摩囉雞飯令大少爺開心地笑了~

首先講個雞做法,我跟may姐食譜

好易

雞    一隻,用一湯匙粗鹽、2茶匙胡椒、一湯匙玫瑰露酒同蒜蓉1湯匙,塗勻雞內內外外

再用2片薑同西芹葉1札塞入雞腔內,包好放雪櫃一晚

焗爐預熱200度,搽上牛油,焗30分鐘,焗時流出既雞汁留起備用






飯做法:(我略為簡化版)

洋蔥   切粒半碗

黃薑粉    2茶匙

番紅粉 半茶匙

鹽    適量

蛋     2隻

隔夜飯   2碗

提子、杏仁片隨意

將洋蔥爆香加蛋,再炒勻,做成碎蛋,加入白飯、焗雞時流出既汁,加黃薑粉、番紅粉、鹽炒勻上碟,灑上提子乾及杏仁

*番紅粉 city's super有售,如果買唔到可以skip,但如果有番紅花既絲,就用1茶匙熱水浸到出色,再用其中2茶匙(may姐做法)

*may姐有加咖哩醬2茶匙,但我無加,只係加多少少鹽,大家都可以照跟may姐加咖哩醬呢!



2012年4月25日 星期三

忙完後……


好耐無見,當你見到天上星星,可有想...想起我

我今日好忙,同呀烏吱食lunch

然後落CWB行左陣街

但個天不斷黑黑地,又怕落雨、唔想真係日日夜夜都買野

所以just looking

其實有時即使唔買,睇下都好,可以吸收新資訊

我乜都睇一餐既呢

最後去ikea買毛巾,大毛巾減價$69.9,有深紫色、就買兩條

ikea減價啊!但我剛剛換左好多傢具,所以無買呢

跟住去Fissler,佢地sponsor隻 frypan比我試

所以我拎完隻pan就飛奔回家,諗煮乜

今次試下煎帶子,買左大隻既帶子,但又未係jumbo size

你見到中間深色塊係脆煙肉,再煮個意粉

我出去食都會見到脆煙肉,So......... 2仔底超跟




帶子溶雪,沖洗,索乾

然後煎時先加鹽、少少胡椒及少少檸檬汁

隻pan好好用啊!佢夠熱一放帶子就可以煎封表面



煎完後只需用熱水浸就ok,好易洗




等我諗下可以點玩下先~

2012年4月24日 星期二

軟骨變牛筋(附豬軟骨食譜)


我終於令豬軟骨變牛孖筋

話說我之前用盡方法去炆,仍然得唔到我想要效果

就係軟骨變啫哩,今次終於得

我係一個想點就要點既人

細個時想得到一件玩具,就係都要得到為止

玩sim係都要完成任務得到獎品

總之我要得既野就要得到

幸好,我由細到大都只希望得到一個高我好多、皮膚唔差既老公,最後.....我得到~哈哈

所以我煮野都係要煮到為止

煮完唔滿意我會記晌心,然後又再煮,直到那一天我煮得好、煮得到又影得好我先罷手
今次個豬軟骨我整到,下次一完要更好
因為我好鍾意食變左啫哩既軟骨,感覺得到好多骨膠原

今次係中式炆法,用柱候醬



睇!佢軟晒又唔係爛晒,用牙簽輕易篤到入去架







Look!第一次用Fissler高速煲去炆豬軟骨

未能調節得好

第一次用2度,炆40分鐘,出來軟骨已軟但未係滿意

再試3度 ,炆多15分鐘,佢剛剛好

所以應該一用就用3度 炆30~40分鐘應該就可以

下次會再試多次

炆完可以撇油


成日有人問豬軟骨邊度買,City's super有,佢每件都有軟骨位

細細件

凍肉鋪都有,可以去睇睇




食譜:

豬軟骨   1磅或隨自己按份量

白蘿蔔    1條

紅蘿蔔    1條

乾蔥頭    6粒

薑蔥適量

柱候醬   2湯匙

水     200ml

生抽     1茶匙

鹽半茶匙

冰糖     一小粒(似茶匙咁大粒便可以)

酒 半湯匙

做法:

用薑、蔥、少少紹酒加落滾水中,然後將豬軟骨飛水備用

燒熱鑊加薑片、蔥、乾蔥頭爆香,加豬軟骨及紅蘿蔔,再放兩湯匙柱候醬兜勻,分兩次加水,再加鹽、生抽、酒、最後加冰糖煮滾

用高速煲,就蓋上蓋,用3度先炆30分鐘,減壓,然後睇下軟骨夠軟未,未夠就再炆10分鐘!如果夠軟就加白蘿蔔,再用明火既細火炆15分鐘等佢更入味
用明火炆,就水份一定要夠,炆到最後15分鐘先加白蘿蔔(但炆途中要睇下有無乾水,如乾水遂少加熱水)

*最後先加白蘿蔔原因免白蘿蔔過淋

2012年4月23日 星期一

家事一則


生命影響生命,我好感受得到

我經過11年,影響大少爺好緊要

琴日崇拜後,例牌同弟兄姊妹飲茶,然後就同大少爺去shopping

咁其實大家都累,陪佢去買左對鞋後就話不如買d野返屋企煮晚飯

要簡簡單單既

咁好照舊落City's super睇下買乜

大家都知我一向都奄尖,原來大少爺都感染左

行入去時我睇緊d魚,佢見到日本既醃魚

跟住佢話:咦!唔使整就食得,一睇佢個樣知佢"死鹹"架啦

我忍唔住笑,"死鹹"係我成日用黎形容d好鹹既野,死鹹得個鹹、除左鹹就係鹹,無層次既鹹、除左鹹無任何其他味道

居然我既呢兩粒字由那位大少爺口中所出!哈

我買左澳洲牛肉漢堡扒,然後話:um...我用澳洲純海鹽、葡萄牙橄欖油、加日本蛋、加泰國香米、同少少美國黑胡椒

結果…碟飯送到大少爺面前時,佢自己喃喃自語話…澳洲純海鹽、葡萄牙橄欖油、加日本蛋....etc~

大少爺,其實上述既野,組合埋咪只係一碟懶人碟頭飯囉!你真係純品!哈哈

樽鹽係我好友去澳洲旅行時買比我,喜歡極了~

無論任何朋友去旅行,我都只希望要一樽當地出品既海鹽呢



昨晚的小兒科~

2012年4月22日 星期日

Dyson機械臂試用感


之前dyson送左隻機械臂吸塵機比我

一直未開來用

原本大少爺都唔太心動,因為我有部小露寶無線吸塵機

但係呢當大少爺拆開裝好再試用時.....就愛上

佢本身比想像輕

而且吸力強

又唔阻位置,同埋唔會好似一般大吸塵機咁會...臭

佢個過濾可以用水洗架




佢好堅,吸得好乾淨,同埋佢叉好電係無線既

唔使好似以前果d咁咁論盡

濾網可以用水沖洗呢樣最好,加上你倒塵時只要一開蓋就倒得



吸牆邊、櫃邊呢d好緊要

櫃邊一多塵易生蝨,塵瞞

同埋佢可以除去支桿吸車地毯,車一有塵會狂咳


總括來講…靚仔、方便同埋易handle、唔重




佢可以掛牆,但因為要鑽洞

那位可能識鏽花既大少爺唔識鑽

所以…遲d搵朋友來幫手呢




多謝Dyson

2012年4月21日 星期六

六甲




好少星期六會寫blog,但我實在有野想講

話說我好少買波鞋,因為我覺得自己著波鞋唔好睇
亦唔適合style
但一定要有波鞋
因為落雨最好著波鞋
落街著波鞋都方便
而且去教會camp都要有波鞋


所以即使有兩對converse都仍要有波鞋傍身


我早幾日不停買野,其中一對新波鞋,無著過

大少爺早前成日曬乾d茶包,話可以放晌鞋裡面辟味,但重點係:無鞋有異味

我都無理佢

直到今日我要落街,於是將對腳穿入新波鞋內,其中有一隻(*注意:係一隻)入面有d異物

當我隻腳放番出來發現係一個曬乾茶包,但穿左

換言之…d茶葉跌晒落鞋裡面,我要"登"佢兩次先能夠"登"番佢出來

仲要搵大膠紙貼番出來

那一刻真係無語問蒼天

大少爺好好彩,近幾年我收左火,否則連人帶座椅會被我orange上天花板

如今我只覺得佢好好笑,同埋會被禁止再玩....T(tea)-bag

激死!


我攪完隻波鞋落街買野煮晚餐,因為我連續3晚都出左街,更無煮飯

所以原本星期六日吃喝玩樂免煮飯既我,都煮番餐

一餐簡單清淡d既晚餐

有菜、有蒸新鮮魚、同花甲粉絲鍋

咁早煮因為少爺要返團契呢



好簡單,先煮花甲,通常魚販用水養住既花甲會已經吐沙

所以唔需要再吐沙

煮到花甲開口,先撈起花甲,再放粉絲煮軟,個湯會充滿花甲鮮甜

可以加少少鹽,然後花甲回鍋,加少少花雕(中菜加中式酒),再滾起就熄火,連鍋上

其實如果買到新鮮羅勒葉,加d落去會更好,但我買唔到

一鍋鮮味既花甲粉絲鍋好易做呢





AUF撀脂緊緻輪廓 @ Reenex


話說上星期Reenex原本有一個event

但繼姐生日飯,我當然朋友行先,去繼姐生日飯啦

咁我同PR傾電話時,順便問最近有乜新野

佢話有個 AUF 擊脂緊緻輪廓療程可以收緊輪廓


原本我都唔係太大興趣,但諗下一試無妨於是就答應

之前做過4個療程,都有成效既

咁就試

點知............今次好work

話說我去做當日塊臉好腫,都無乜期望真係可以一次消腫,點知…真係可以

美容師幫我做半邊臉後,已經感覺到結實左

經歷一個半小時後,水腫消失了~~~~係我第一次覺得真係好神奇既course

你地都有機會可以試.............................











只要係4月27日或之前,留comment講講你想以AUF療程所解決的肌膚問題,Reenex會於4月30日前選出一位寫得最好的fans,即可免費體驗AUF撀脂緊緻輪廓面部療程一次 (價值:$4,100)。
完成療程後,f更可獲 BIODERMA 100ml 卸妝水一支! 把握機會

又或者

1) *免費: CPS更生活膚療程(面部) x 1次 (價值$730) http://www.reenex.com.hk/edm/201203/RCNCR0312U/Form.aspx?ref=RBLOG1211E

2) *#半價體驗 (即$2,050): AUF 擊脂緊緻輪廓療程(面部) x 1次 (原價$4,100) http://www.reenex.com.hk/edm/201110/RBLOG1011E/Form.aspx?ref=RBLOP0412C 完成療程後

更可獲Manning coupons $50 一張!#如果fans用$2,050試完AUF,而當日即時開6次AUF course,可免收試做價!!!~*

以上優惠只適用於首次試用reenex療程服務及年滿18歲之女性新客戶。



 

2012年4月20日 星期五

港醬


近年港乜港物都被標簽著有d眨意

遠古d有.......香港腳

近代

港女....一個我唔明亦唔想明既名詞,講到香港女仔好差咁


仲有

電視機無論發生什麼爭論都會話:你地d香港人歧視..............


如果要我標簽,我只會標簽食物,港式一切都係美好既

港式....奶茶

港式....菠蘿油

港式...叉燒飯

如果用食物角度去批評

我會問:點解香港集團快餐店價錢咁唔合理?偶然會去買大家X早餐,或者為左好想飲凍0茶而去買下午茶

總會覺得…點解份量縮少、但價錢澎脹啊?

當然人微言輕既我唔能夠改變任何事

但我....至少可以學整佢地既食物,然後share 食譜!哼


Anyway,今日我午餐:港式肉醬意粉~


2012年4月19日 星期四

Sorry or Thank you?(附香蕉楓糖蛋糕食譜)


近日好好好鍾意食粟米片做早餐
粟米片加鈣思寶或低糖維他奶
鍾意得好緊要,粟米片要原味,唔要香甜
總之好鍾意


有時人係矛盾,世間實在有太多太多人或事去提醒你

要食得健康

但總係寧願先忠於自己口味,然後再去諗補救方法

做蛋糕都一樣

有d蛋糕可以用橄欖油去整,例如戚風,我會覺得好好味

但有d蛋糕真係要用牛油先可以

例如…楓糖香蕉蛋糕,試過用橄欖油焗,跟本唔能夠有個香味

食落爭少少,呢少少令人感覺有點點遺憾

但係又唔係唔能夠接受

所以…焗呢個蛋糕可以有兩個遺憾去選擇

1)用牛油去對身體say sorry,但滿足味覺

2)用橄欖油對味覺say sorry,但對健康say thank you

哈哈~


人生…總係有少少遺憾,但又總會捱得過……

所以...我再焗會用牛油



無鹽牛油   80g

砂糖    15g

蛋   1隻

楓糖漿  55g

低粉    100g

泡打    1茶匙

奶   25ml

香蕉    2隻

做法:
牛油與砂糖打自淡白色,分幾次加蛋,用1號速打勻

2.加入楓糖漿拌勻

3.篩入低粉、泡打粉輕手拌勻,最後加入奶拌勻

放入切段香蕉 170度焗30分鐘(視符焗爐火力而定)

2012年4月18日 星期三

芝油菠菇




今日回復平靜,shopping既快感要靜止
雖然天氣涼涼地,我仍然好想外出
不過,僅餘理智叫我冷靜一下,哈

我由細到大都唔愛食菜,只愛食生果

一直覺得長輩一日到黑叫人食多d菜好煩

我腸胃一直好好,甚至有d敏感,所以無"缺乏菜蔬後遺症",俗稱:便祕

中式煮法既菜我覺得好討厭,相反西式煮法既菜我就鍾意

沙律菜我都愛

偏偏唔愛中式菜

但無辦法,人一定要食菜,而且我有個鍾意食菜、生果既大少爺

所以我每晚都會行屍走肉咁放d菜入口

但近來…我開始食多菜,原因…不明

身體好似好有需要咁叫我食多d菜,於是不明不白地食菜

甚至早排我居然好想食烚菜心

所有大家見到凍檬、砂鍋雲吞雞,都開始煮d我認為可以更好味既菜


感覺自己唔能夠再像猛獸一樣食咁多肉,要像熊貓食竹葉


琴日去完街當然無煮飯,落City's super見到有機菠菜,於是去夾定d磨菇

預定今日午餐:芝士奶油菠菜焗磨菇

一餐清淡午餐,feel so good~~~~~~~

哼~即使素食仍然要像樣的


先煮奶油菠菜釀入磨菇再加芝士焗!done~

各位觀眾:滋油淡定個fd,芝油菠菇


呀菇,好靚啊


2012年4月16日 星期一

乾(附食譜)


星期六、日好唔得閒,但感覺良好

唔知點解…星期六日即使係我平日唔使返工,個壓逼感都會較少

星期六日反而唔係咁出街,但係仍有舒服既感覺

星期一至五,連煮飯都趕時間d

星期日返崇拜、然後好多時會一班人去飲茶

跟住正常會回家午睡,到夜晚會比平時較夜去晚飯,之後睇電視

無乜特別但舒服,或者大少爺放假令我感覺開心吧

琴日崇拜後都係參予教會活動

因為要睇電視夜晚堅持煮飯

睇金像獎,其實我鍾意睇d明星著衫,獎項反而無乜感覺

整....乾煎辣椒茄汁蝦碌,個蝦要煎得夠乾身、個汁要乾身剛剛好,乾左佢吧

噢!加了辣椒既感覺又有所不同,我好奇怪,鍾意落辣椒多過點辣醬

不過tabaco煮野又會幾好味

今次個蝦碌…好滿意

哼~




唔知點解,晌個新裝廚房內影親相都out focus

想影下煎蝦情況,但千鈞一刻間總係...............情深深雨濛濛



食譜:

虎蝦/大蝦   8隻

汁料:

茄汁   3湯匙

0急汁  1湯匙

紹酒   1湯匙

生抽   1茶匙

糖 1茶匙

粟粉   2茶匙

辣椒隨意



做法:

將蝦略沖洗剪走蝦眼位、及腳,挑腸,然後完全索乾水份,放入雪櫃雪30分鐘
(雪過既蝦會較實淨)

沾上適量粟粉,唔需要太多,剛好表面沾上就可以,然後煎,煎至8成熟及蝦身金黃色

將醬汁材料攪勻、加辣椒倒入與蝦兜勻,兜至乾身後可以上碟

done~


2012年4月14日 星期六

Tasting @ DiVino Wine Bar & Restaurant


今日慶祝繼姐生日,再行一陣街好累

行街對我來講可以無休止去行,但天氣漸漸熱開始辛苦

塊臉好快就油浸一樣,於是上Fei E度拎 skin care用

無錯!又上去拎野!哈

今日先寫一篇邀請篇,早兩星期六 Divino邀請去試食,於是同助手事頭婆去

晌雲咸街

餐廳半開放式,可以望住街,其實我都好鍾意望街的











我要杯草莓薄荷特飲,用新鮮薄荷去整

好愛薄荷味的




Egg Benedict

晌我自己整完兩日後去試

呢間餐廳有個EGGSTREME BRUNCH for egg lovers. Chef Michele brings a fresh approach to the Brunch menu, by using the Safegg Pasteurized Eggs/DHA Pasteurized Eggs with the finest and freshest ingredients, to let the guests to savor the hearty Brunch





揀左個沙律,好好食

個沙律用唔同芝士去做三款沙律




水牛芝士







呢個我最鍾意,芝士配露筍再用黑松露

good




主菜我要牛牛
我要七成,但有少少過左火候呢







甜品 panna cotta,三款味,三款都好味

中間咖啡我至愛!係焦糖咖啡味呢




Tiramisu

都唔錯啊!




多謝邀請!

2012年4月13日 星期五

凍檬、蔗蝦大作戰 (加檬粉及檬汁食譜)


近來人人講盛女大作戰

琴晚我先第一次真真正正坐低睇

然然後上mytv睇番之前一集
um......"人生導師"呢樣野我有d感覺
到底乜野係人生導師?
對某些skill上較突出就做到?
用"人生"導師,呢個詞太serious了

但Mei ling我就幾欣賞,佢講既野好實際

至於參賽者,唔公開評論,因為各花入各眼
如果你要去尋找愛情或婚姻亦唔係將自己改頭換面一定會搵到,心態上都需要調整呢
不過…近幾年"剩女"呢個名詞出現我反而有反感,講真點解要用呢d名詞去標簽人呢?

天氣都令我煮既食物都有調整

因為琴日悶悶熱熱,令我好想食凍檬

於是澎澎聲去買材料整香茅雞翼凍檬,點知最尾站去買檬粉時發現....賣晒

無語問蒼天

回家後唔忿氣,再去遠d買,買到了

噢~一餐令自己快樂既越南菜

哼~

蔗蝦


我用焗既方法去焗,都唔錯啊

買蝦膠回來,先撻佢十幾廿次(撻佢可以令蝦膠彈牙),然後包住竹蔗,面層搽薄薄既油,然後220度焗至金黃色




做了香茅雞翼凍檬,Great~

做埋個檬汁,不過無影到,檬汁自己整的確更好味啊



檬粉
1.將檬粉煮一煮,煮唔使太耐,過冷河,最後用冰水浸一浸瀝乾水備用

食時將檬粉放最底,再放切絲既生菜及紅蘿蔔絲,面層放上肉類,再灑花生碎


碌冧 (魚露汁)


魚露   3湯匙
糖 3湯匙
青檸汁 3湯匙
水 3湯匙
醋 2湯匙
蒜蓉   2茶匙
辣椒3小隻切碎
以上撈勻放入雪櫃一晚!
*呢個份量整到得約一飯碗既汁,糖份係比較多,注意~自己認為OK先去整

2012年4月12日 星期四

試菜@美心之「五邑‧想家」系列


天氣開始熱,琴日著短袖衫

天氣又唔係太好,想洗晒冬天衫入櫃安安樂樂又唔得

不過皮膚開始好轉,起碼無矛盾肌啦

晌屋企點香薰係超舒服既一件事,近來換電香薰爐,感覺安全好多

一點香薰就會留戀晌家呢

今日休息下,寫下邀請篇

早前美心集團邀請,其實每次去美心試菜,感覺都幾好

因為每次都有新菜式新嘗試,可以令我有新思維

當然我知道試菜一定會食到好野!哈


香港‧2012年3月28日五邑,即江門市新會台山開平恩平鶴山五邑是「 中國第一僑鄉」,離鄉別井的五邑人,難忘家鄉的味道。 五邑菜仍充滿農家情懷,為出洋謀生的鄉親,保留住最傳統的味道。


廣海回味無窮(生炸咸鮮)  $48
來自廣海的鹹鮮,屬台山名物。將廣海三牙魚起肉, 以海鹽水浸泡後自然風乾兩天,讓魚肉變得結實緊緻, 留住鮮味而充滿鹹香。與蒜茸一起生炸,金黃香脆,相當惹味。

呢個我好鍾意,d鹹鹹香香既食物,又整得幾好





恩平白切肉 $48





一爐火天麻燉魽魚 $198 (4-6位用)

五邑人愛飯前飲湯,更飲得適時保健。特選西江的名貴魽魚, 肉質爽嫩,與天麻、川芎、百芷及新會陳皮燉湯, 用上玉扣紙將燉盅封口,再以一爐火持續燉煮,濃縮味道與藥性, 能袪風止痛、平抑肝陽、行氣活血、和胃健脾,對治療頭痛、 頭暈更見功效。

呢個湯我幾鍾意,我鍾意有少少藥材味既湯






陳皮火蒜蒸西江魽 $168

新會陳皮,以新會柑製,味香皮薄色亮;開平金山火蒜, 用獨子蒜煙燻,蒜味香濃。兩雄相遇,與上佳西江魽魚一起蒸煮, 提升河鮮獨有鮮味。

魽魚都幾好食,因為夠滑,但我諗我唔識整呢






開平鹹雞籠 $28

開平過年食品,亦是古老的飲茶點,因形狀像雞籠而得名。 以糯米粉搓成粉糰,包著雞肉粒、蝦米及菜圃等, 疊成雞籠狀炸至酥脆,是充滿懷舊氣息的民間點。


呢個好食,似鹹水角,但名叫鹹雞籠,哈!


蔥油麻薯

vanlily最鍾意既地方



甜水蘿蔔黑豚骨 $98新會甜水蘿蔔與家鄉黑豚各具特色,將兩者一同煲滾飲用, 拼合濃郁的鄉土情懷。黑豚排骨蘸點附上的白鹽品嘗, 黑豚肉質與肉香即時呈現,與蘿蔔的鮮甜多汁成為絕配。
呢個我無食,太大件既豬肉我唔太食,但vanlily話好食!





台山焗蟹砵 $168

呢個不得了,我超愛,佢似焗魚腸,但轉做蟹,好味到不得了
我決定自己整!買到個砵後就動工,But,個砵邊度有得買?
我要將呢度菜..........據為己有..

看著你 我便會痳痺
再沒法 呼吸一口空氣
愛著你 手便要留連一起
抱著你 我便會恨你
痛恨你 不講續集日期
我一想你 為人便自私得討厭死

唔好意思!我好鍾意趙學宜呢隻據為己有,個蟹砵令我哼起呢隻歌!哈哈





馬岡豉油鵝 $138 (半隻)

開平馬岡鵝之所以聞名,在於其皮薄而肉紋纖細,口感嫩滑, 鵝肉味濃。簡單以豉油鹵水浸煮,最能展現馬岡鵝的優秀之處。 當地亦有香燜鵝、燒鵝、五味鵝等製法,各具家鄉風味。

呢個豉油鵝,我幾鍾意,佢唔會似其他既炆鵝有肥膩感,豉油味又夠






清炒共和葛 $78

粉葛一般能煮能燜不能炒,全因纖維太多,口感欠佳。 鶴山共和鎮盛產的粉葛,卻是細嫩無渣,而且味道自然清香, 蘊含豐富維他命及蛋白質,配上鮮腐竹、紅棗等清炒,滋味無窮, 更有益健康。
呢個清清地,唔錯






台山菜菓飯 $128台山人最愛的懷舊菜,特選台山芥蘭頭,加入臘肉、臘腸, 先炒後焗香米飯,芥蘭頭如水果般爽脆清甜,飯粒充滿甘香油份, 每口滿滿都是回憶裡最教人眷戀的鄉土風情。

呢個飯好食,佢有臘味,但又唔膩呢




有甜品的,但我唔記得影相了

美心!多謝邀請
就係覺得好食,更希望你們分店都keep到水準啊
Thanks