2012年5月31日 星期四

超愛@Sevva


 吃喝玩樂既日子真係好開心

感覺像假期

今日去Tea,一個多鹹少甜但每款都好味既 Afternoon tea

原本我最喜愛既Tea地方係四季,而家要退位讓賢

新排名榜係

Sevva

四季酒店

然後係
Le Salon De Thé de Joël Robuchon

我喜愛tea set一定要鹹點好味,甜點都重要

我好怕成個架都係糕點,仲要d蛋糕隔夜咁既味,我會覺得佢浪費我時間同胃既空間呢

呢個架每一款都好味




呢個蟹肉漢堡超得















煙三文魚好得,個三文色係有軟度,唔係果d死鹹、膠質

呢個煙三文魚鬆餅好得

隔離個春卷都超好食






個牛肉漢堡包,又係好得

有個雜菇鍋粑係驚喜

卷住一條條雞肉三文治






另有三文治同黑松露炒蛋多士,個蛋好滑,但多士感覺實了



甜品

Crunch不負眾望好得




栗子配 Meringue ,出奇地個meringue唔太甜

甘筍蛋糕有質感

粒士多啤梨大而甜

個古力蛋糕都唔錯

又係每一件都好得






隔離檯叫既Princess 蛋糕,好靚啊

500g $720,真係好靚啊

隔離檯生日主角好好,比我地影相

因為.......................






因為我係同Diana去Tea

姨甥仔承熹做友誼先生,不停撩人,佢又好可愛,攪到個個都開心

小朋友呢個階段好得意

佢有問有答有主見,我每次見叫佢臭豬佢就會狂笑,哈


















我愛坐室內



又可以揀室外呢









室外個view好靚


















































2012年5月29日 星期二

Hea煮 (配Hea餐食譜)



上文提到…今星期爆忙,忙吃喝玩樂

於是好想慢煮一餐

其實我個人好快手

乜都快人一步理想達到,我唔明點解人係會慢(純粹我個人歪理)

人生時間好短暫,像霧一般好快散去

正如聖經裡面所講:
其 實 明 天 如 何 , 你 們 還 不 知 道 。 你 們 的 生 命 是 甚 麼 呢 ? 你 們 原 來 是 一 片 雲 霧 , 出 現 少 時 就 不 見 了 (雅各書4:14)

所以我乜都會快快做好,想到就去做,有得做就做,唔希望浪費時間

不過…因為我個人好快速,往往就會錯過左一d野

我亦要求別人同等速度,所以成日嫌人慢

煮飯我都好快速,好似三扒兩撥咁

直到琴日我好想慢慢去煮一餐,唔好咁急趕,因為今星期至下星期頭,即使我能夠煮,都會係好急咁煮

於是慢煮一餐

但最後結論我唔係慢煮,係Hea煮

我平時雙鑊齊開,今次煮完一樣到一樣,對我來講已經係......Hea煮

琴晚晚餐:碟頭飯

煎牛柳配牛肝菌磨菇汁,檸檬海鹽煎蝦、西蘭花配磨菇

檸檬海鹽煎蝦好食,簡單,煎香佢好得

將蝦剪走蝦眼、腳、挑腸再中間剪開,用廚房紙索乾水,再放入雪櫃30分鐘等佢乾爽d

灑上海鹽、檸檬皮、少少胡椒,幾滴檸檬汁,然後煎

將肉既方向打平煎左先,就可以避免佢縮埋一舊





好專心咁煎,棄用LC,用Fissler煎pan




牛肝菌磨菇汁:

磨菇先煎香,加1.5湯匙麵粉炒勻,然後加100ml淡忌廉、2湯匙牛肝菌醬、60ml雞湯,少許鹽

慢慢煮杰備用



牛肝菌醬






2012年5月28日 星期一

Tasting@ Ambrosia Oyster Bar & Grill


星期六、日都過得好暢快

今星期爆忙,全因我病了兩星期、又生眼瘡,將所有約會推到今星期

幾乎每日都係同朋友見面、shopping,仲有個試菜既event

但我都會抽時間煮飯,因為我唔會用任何藉口去冷落大少爺,佢才是我生活中既重點

雖然佢"曬衫桿",食極唔肥,但卻是我生命中的最重要既重點

我望住個日曆,睇住自己既約會,卻不停去想,去完街就去邊度買材料煮d乜係快靚正既呢?

不過…我都只不過去CWB,TST同中環,總有City's super在左近呢

好!剛過去星期六去Tasting Event,由KC安排既,仲有澳洲得獎蠔場Pristine Oyster Farm莊主MR  Brendan Guidera到來分享

講真…從來澳洲蠔都得我歡心,澳洲蠔質地會爽,其次我都愛法國蠔

但最唔鍾意係美國蠔,太creamy

今次試7款,其中一款係莊主送既

我好細個就食生蠔,因為老豆係蠔迷,佢係瘋狂愛生蠔既人,我由唔食到試到真正享受都係從佢身上學到

但佢從來無話我知蠔既帶子位係不能錯過

導致我錯過多年後,星期六先知個帶子係無比的甜!從今起我一定唔會放過呢

每一隻澳洲蠔都爽甜,海水味濃,味道由淺入深,望番都回味




從來都愛白酒多過紅酒













主菜我揀三文魚

grill既三文魚同油浸既分別都大,整既火喉好重要

呢件唔錯!至少外脆同唔算"鞋"


同埋還有…豬架


慢燴鮑魚配扁麵





甜品

一個用焦糖成份做既脆筒配雪糕,再加榛子味泡泡

完全令人感覺美滿既甜品!Like



謝謝Ambrosia 邀請及KC既安排 
席間又認識新blog友,去tasting event最重要有交流,從而吸收經驗同有新思維啟發












2012年5月25日 星期五

蠔邁(附蚵仔砵食譜)


好愛食焗魚腸,仲要係好細得幼稚園時已經愛上

因為當時我有個幼稚園同學佢家人識整,整完就會送比我地

以前d家長係可以做到好朋友架

我一直想整,但那位大少爺又係唔食既!不過…講真我唔識處理魚腸,咁點好?

用蠔仔吧!

我托朋友幫我買左個砵,呢蘇乞丐個搵食架餐呢!不過…未約佢拎

所以用住自己個兜先

到個兜到手,我一定再整多次,哼~

好心急分享食譜







自己整可以鋪滿油炸鬼!好脆


食譜:

果皮    1片浸軟切粒粒

芫茜    1小札切碎

鹹蛋黃   1隻

蠔仔    半斤至1斤

雞蛋    4隻

油條    半條

水 100ml

鹽 1/4茶匙

胡椒粉適量

做法:

先將蠔仔沖水,檢查有無蠔殼,然後用粟粉輕輕摔,沖水洗淨,再煲一煲水,灼一灼蠔仔,唔好灼太耐,剛熟便可以

果皮切粒




芫茜、鹹蛋黃切粒


將蠔仔、果皮、芫茜、鹹蛋黃鋪底



蛋打勻加100ml水、然後倒落已經材料既盤當中




加上切片油條


鋪上微波爐保鮮紙,大火蒸15分鐘,熄火

掃一層油晌蛋面,薄薄一層,此舉可以令油條鬆脆

預熱焗爐200度,再焗10~15分鐘,或呈全黃色(視符火力)






幸福之膽


琴晚繼續睇心戰,最尾播完時,鄭少秋讀出以下句子

時間可以沖淡一切
但如果時間都沖唔走你對佢既思念
佢就係最幸福既人
而你就係最悲哀既人

呢幾句說話重重打入心中,我相信每個人心目中,總會有一個人長埋深處

不管"那個人"在明,定在暗(只能藏於心,不能宣告的)

原來永藏於心內既人係幸福,我相信!

我都希望成為一個幸福既人,永遠都會有人將我藏於心上

一個明媚既下午,一碗幸福既炒飯

呢個炒飯上海膽,足夠令人感到幸福,海膽加上炒飯係好好味

再用三文魚,自己用鹽去醃一陣,令到三文魚有鹹鮮味,雖然係炒飯,但我都要炒飯係"哼"既

隻眼眼挑針好轉了,相信下星期又係我週街去的日,呵



仲有昨晚煲既綠豆沙,雪凍今日食

用來撲滅心中既心火盛





將綠豆用冰水浸一陣,再放入大滾水中煲

用綠豆沙用高速煲去煲,只需要8分鐘




減壓後滾多5~10分鐘,攪掂,一個快速既方法去煮既






2012年5月24日 星期四

明明


有無睇心戰?睇唔睇得明?我明

覺得幾好睇同緊張

尤其係琴晚,以為已經殺左呀伯母,卻又走番出來

終於有套劇我想睇落去

大少爺好鍾意食肉絲炒麵,佢近來如果買外賣都會買

於是我琴晚整比佢

但係呢…我唔想炸,無啦啦炸個麵

於是諗到底焗得唔得?

結果係..........得!

明明係炒麵,幾成了焗麵?其實我想見多你幾麵

不過我手痕,無啦啦加d蛋白,攪到無咁靚




收麵餅用熱水略浸熱水,要即刻撈起,風乾

跟住放入180度焗爐慢焗,搽上一層油

焗到中途略為整到鬆散,再焗

其實炸最快,但實在炸野個過程不太好受




近日晌收音機聽到呀sa隻新歌明明,都幾好聽

明明有d事好簡單,總係節外生枝

其中一節……

我記得生病 照顧我依偎附近
替我煲中藥 晝晚也不分
我記得經過 有過教堂的市鎮
你放輕聲線 說過了婚姻

幸運的相遇 用盡大家的幸運
日落了以後 大道便會暗
你說的珍重 語氣太窩心
承諾過終生的約卻沒下文

明明不應該牽掛你神情 明明不應該將細節辨認
明明雙方都打破約定 彼此都需要冷靜
怎麼始終我揮之不去窩心笑聲

明明不應該一再說明明 明明好應該相信這是命
明明燭光都燒化散淨 怎分開都已決定
怎麼一想你始終都會沾濕眼睛 人寧願金魚般記性
乜金魚記性好差麼?不過…我幾鍾意林若寧既歌詞


2012年5月22日 星期二

Crossover w/新奇士 (附麥芽橙汁豬扒食譜)


哈~琴日講到收到兩大箱橙同檸檬

的確帶比我朋友好多歡樂

因為收到既收二日係幫大少爺開生日會

跟住由開席到散場都見到有人晌度食橙,到佢地走時大少爺叫佢地都拎d檸檬走啦

跟住見到d朋友好似生果檔揀生果咁揀來揀去

當興高采烈之際............突然我大喝一句:膠袋5毛子!
跟住全屋人望住我,七咀八舌咁話:我有帶環保袋架、呢個膠袋我自己架、呢個膠袋唔係你架

哈…出門口送客時仲要比我檢查

呢兩箱生果帶比我地無限歡樂,分享亦都係一種快樂~

話說琴日整左檸蜜雞,今次用橙做既係乜呢?

今次整麥芽香橙豬扒

點解會有麥芽?係麥芽糖啊!加麥芽糖會好有光澤

同埋我個汁只用橙汁同白醋,唔想加其他例如茄汁之類,唔想有其他味道

琴晚醃時我榨左d橙汁落去醃,咁樣會鬆軟d呢




食譜:
豬扒4塊搥鬆,加生抽半湯匙、糖1茶匙、新奇士橙皮 1個(刨面層橙色層皮)、新奇士橙橙汁 1/4個、粟粉1茶匙,蛋白1湯匙醃過夜

先煎熟豬扒,煎之前加粟粉搽面,煎熟

汁料:

新奇士橙    2個 (榨汁及刨橙色層皮)

白醋   1湯匙

糖 2茶匙

另外

麥芽糖     1湯匙

水    2湯匙

粟粉水:
粟粉     1茶匙

水     1茶匙攪勻

將橙汁、白醋、糖攪勻備用

將水同麥芽糖用水火煮,煮溶麥芽糖就就入橙汁汁料,煮滾加粟粉水

最後豬扒回鑊兜一兜便可以上碟



今次所用既檸檬同橙均來自美國加州及亞利桑那州的新奇士®






2012年5月21日 星期一

crossover w/新奇士(附檸蜜雞食譜同旺財)


星期六晚參加Diana個女既百日宴,身為姨媽既我…好開心…人生第一次玩波波池

呀妹安排了波波池比在場小朋友玩

當呀妹同佢老公見到我同tan tan兩個坐左晌裡面,大為緊張!佢老公同我講:唔招待大人架

哈哈!遲d影多d佢個女d相比大家睇,實在太得意

早兩星期新奇士PR搵我,想我寫兩個食譜

隔兩日朝早.......8點有人按鐘,大少爺打開門見到有人送兩箱野,打開後..............................

哈~當大少爺同我講時,我出廳睇,惺鬆睡眼都忍唔住大笑

新奇士送我檸檬同橙

第一個檸檬食譜我寫番之前情人節好多人跟住整既檸蜜烤雞,同大家溫故知新先

可以用雞下脾、原隻雞、或雞翼

做法:

雞 一隻

新奇士檸檬    2個

粗鹽、胡椒適量

蜜糖

將雞洗淨抹乾、搽上粗鹽、胡椒,只需要薄薄一層搽勻就夠,尤其雞脾雞翼好索味,雞胸可以搽多少少

然後灑上檸檬皮,少許檸檬汁醃一晚

220度焗爐預熱,先鋪上錫紙焗10分鐘,雞開始轉色,然後拎開錫紙焗 10分鐘,搽上蜜糖焗5分鐘或至理想顏色

食時可以再灑上檸檬皮

*檸檬刨皮只需要黃色部份,白色會苦的






我仲;用新奇士檸檬加士多啤梨整酵素,Mommy dearest話酵素好有益又易整

但要等兩個星期,琴晚整士多啤梨味,我打算整多樽,但未諗到整乜味好

據說……可減肥美肌同埋排毒、仲可以對身體好架~大家可以search下





12個鐘後,但未有泡泡

我會定時更進佢進度架!我第一樽酵素,改左佢個名叫:旺財

定時旺財會同大家見面,成功後分享食譜吧




一起身見到56個橙同156個檸檬

我打比PR話:其實呢…做乜送咁多呀?哈

聽日有另一個新食譜呢



今次所用既檸檬同橙均來自美國加州及亞利桑那州的新奇士®




用新奇士®鮮檸檬汁作調味,則可減少進食鹽或脂肪

仲有用新奇士檸檬加橄欖油、黑胡椒、少少鹽可以做沙律汁

又或者煮海鮮時,加新奇士檸檬汁可以提升鮮味

白灼蝦加幾滴新奇士檸檬汁可以爽d加

2012年5月18日 星期五

難忘你 (附番茄炆牛展食譜)


之前睇may姐本書,有番茄炆牛展

但一直都無行動

其實我好鍾意食牛展,尤其炆淋晒既,簡直係極品

直到Oisix送來番茄,我就諗起要整呢個

我將Oisix crossover Fissler高速煲,整左一個好難忘既番茄牛展

難忘你的姿態動靜,略帶憂鬱的一雙眼睛

呢個牛展炆好後厚切,食既時候感覺天下我有,好似鯨吞了一隻牛

哈哈!

Look~佢令我好想咬個mon

我悔恨我悔恨把你欺~~~~~~~~~~~

用Fissler高速煲炆15分鐘,如果用火應該個半鐘






今日我仲用佢撈韓國烏冬,呢個茄牛冬真係難以忘記


今次用呢幾個!

日本番茄有茄味,比較甜,無咁爽身,但無吸血疆屍味,係一個好好既體驗呢



番茄牛展

番茄   4個 切件

牛展   2條

洋蔥   1個 切條

紅蘿蔔 1條切片

蒜頭    3粒切片

番茜    1小札,或者用乾既就半湯匙

黑椒    少許

番茄膏    3湯匙

冰糖    適量

雞湯 500ml

鹽   少許

做法:

牛展先出水,出水時可以放粒冰糖,滾水熄火焗浸至水涼

牛油爆香洋蔥、蒜片、紅蘿蔔、番茄、番茜,然後加番茄膏兜勻,慢慢落雞湯

跟住加冰糖,再加少許鹽,試味,試0岩味後,就放牛展

用Fissler高速煲 2號速煲20分鐘,減壓後可以再明火煮15分鐘會更入味

如果用明就細火炆1.5~2個鐘

切片上碟,淋汁便可以







2012年5月17日 星期四

慕絲(Mousse cake食譜)


琴日唔見我,因為休息中,感覺感冒未清

喉嚨有點隱隱痛,愛與痛的邊緣,隱隱又唔係明顯

不過…而家d菌咁勁,未清都係好平常,哈

早幾日答應過寫Mousse cake食譜

但其實我寫完你地未必會明,有圖睇會好d

他日我再整就影埋過程吧

好!講番個mousse cake,你喜歡整乜味都可以

果蓉可以晌烘焙店買到,用新鮮唔係唔得,但有季節性呢

食譜:6吋

果蓉     250g

糖   50g

粟粉     10g

蛋黃     65g

雞蛋     20g

魚膠片   4g

淡忌廉   235g

做法:1.座熱果蓉,浸軟魚膠片

2.先做吉士蛋黃、雞蛋、糖、粟粉攪勻,將果蓉加入,然後座熱水邊攪邊煮真至杰身,加入魚膠片,放涼

3.淡忌廉打起6成,再同(2) fold in,餅模可以放入一片蛋糕做底,然後倒入mousse,再放雪櫃2個鐘,裝飾隨意

*2個步驟如果唔加果蓉,落少少雲呢拿籽,可當吉士醬用

*杰身意思係好似普通吉士醬既質地,能夠成為醬,可以晌用筷子表面寫字


寫食譜唔係我最喜愛既事,但你地鍾意

有時幫下d產品寫Oisix,Fissler用具,有趣既我寫都喜歡,自由度好大,所以寫得開心~

可惜~每次幫d港牌寫食譜就好唔高興,佢會比稿費你寫多個但又唔係for blog既食譜
但最唔忿氣要求多多又咁又咁,到追票時有遲無早籍口多多
最憎追票

所以晌blog寫食譜,即使唔會收錢,但見到有人讚好或者鍾意我都會開心

值得分享既我一定會分享

2012年5月15日 星期二

大少爺生日@山頂















煮完大少爺生日會既野,足夠我累七日,哈

所以大少爺生日正日我堅持出去食

但因為撞正母親節,我又遲訂位,原本想去ICC食中菜都無位

然後訂農圃又無

龍景軒都無

最後谷氣下,上山頂!哼

崇拜後,上完主日學同佢先食午餐,然後就上山頂


上山頂晚餐 Pearl都係訂唔到,最後去Cafe Deco

但都訂唔到6pm

唯有5:30pm去walk in

一個窗口位已經令人心情爽爽,睇住維多利亞"河",個大海窄到似條河



Caesar salad加雞沙爹,好味

天氣熱,爽甜既菜係必需品



豬仔骨,唔想大少爺成日陪我食牛

所以我陪佢食豬

呢個好得!佢夠鬆化,味道剛好唔太濃




Parma ham 黑松露Pizza

呢個又係好好食,佢好食在個Pizza乾脆,Parma ma唔太鹹,有番茄薄片比茄汁更fresh

$200一個pizza有片片黑松露,感覺好抵,哈哈




甜品:crepes

我要芒果味

佢係配movenpick雪糕,仲係味道任揀

我揀左……楓糖合桃雪糕,正



大少爺要香蕉味,配焦糖雪糕!好味


食到7點幾都未天黑,呢個臘燭實在起唔到作用



日太長、夜太短,接近7:30都未天黑




山頂有GOD特別好行

仲有…山頂出出出出奇地唔太多人,無人推撞我,無人批我爭,無人唔排隊

感覺真係舒服d



仲有山頂有幾間店鋪d野好靚

又平

記得都好平

同埋幾精緻

呢件Tee我諗起Vanlily,哈




估唔到因為訂唔到位反而過左個更開心既生日

感謝主!