2013年4月30日 星期二

早來了(冬瓜盅)


晴朗既一日,但我心情未及天氣晴朗

有好多鎖事有點煩

所以我決定今日講少d

主力講…冬瓜盅

無錯!早來了的冬瓜盅,我連夜香花都買唔到

但行過見到小冬瓜,那麼就整比昨晚光臨既貴賓食

小冬瓜細過西瓜,同西瓜波咁上下大,好像一個大蘋果

同有菇、蝦、肉、瑤柱、蓮子

下次我會買蟹拆肉,今次仍找不到肉蟹

其實無乜祕技,但樣樣都要新鮮

肉要買鮮肉,唔好買埋晒d冰鮮肉,蝦要新鮮蝦,雖然d蝦燉完都已經縮水,但鮮味的確唔同

重點將佢滾成上湯,再放入冬瓜燉1個鐘

鹽只需要燉好加少少,唔好放埋鹽入去燉,基本上你材料新鮮,個湯既甜度已經無需要下鹽

食譜:

小冬瓜    2個

蓮子    半碗 (浸軟去芯)

瘦肉    1隻手掌咁大切粒

鮮蝦    半斤(我買了一斤,用了半斤份量便可以)洗淨去殼、去腸,可以留起小量蝦殼滾湯,但唔要蝦頭

瑤柱     2粒(先沖水,後浸軟,瑤柱水唔好倒)

菇     8隻(我好怕冬菇既漏媒氣味,所以用新鮮秀珍菇)

水    600ml~750ml(視符你做個冬瓜幾大)

做法:

先將冬瓜切開,做成瓜盅同瓜蓋,去囊後備用

煲滾水,將瑤柱連水倒入,加埋其他材料,蝦殼都可以放入去滾湯

滾起後轉細火滾15分鐘,熄火後移開蝦殼,其他材料連湯放入冬瓜盅肉

隔水蒸 1個鐘,我用蒸爐就較到100度蒸1個鐘




唔知點解,個冬瓜一定要整d花紋先心息

將個小冬瓜切個小蓋,挖走d核同囊





個蓋我無時間再慢慢攪,所以…




我用呢個新玩具整既,Miele 蒸爐

佢已經比我寵幸了一段日子,我一次過拋棄微波爐、飯煲同隻蒸鑊

佢一次過我可以蒸肉、蒸飯同蒸菜

內籠夠大讓我可以一次過整兩個冬瓜盅


Look,我蒸多層都仲得,好期待新年一次過8底蘿蔔糕





Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年4月29日 星期一

扮晒Mos



今星期好多事要做,有d措手不及咁

昨日同大少爺晚上要去一個安息禮拜,所以崇拜後都回家休息

但又諗唔到食乜,通常星期日你既心情係出去食,沖出你所在既區域出街食

當有一個星期叫你留番晌自己區域食既時候…你會覺得唔知有乜好食

咁不如自己煮?

但星期日你又唔甘心去煮,話晒星期日都係安息日,有乜奶油煮

不過要煮都煮d唔係平常既食物

我無辦法下午煮午餐係正正常常咁一餐飯,佢完全唔配合我星期日既心情

星期日既心情有點替星期一擔心,咪以為我唔使做無呢種忐忑忑忐喎

於是諗一大爛餐後就整…rice burger

佢有飯,適合大少爺,佢似burger適合星期日覺得自己唔使食飯既我

想當年香港未有mos burger,去親日本總會去食佢既 rice burger,而家…過門而不入卻居然自己整

佢當然唔難整啦!

個餡料係用日式火鍋豬肉片,加洋蔥、加紅蘿蔔絲

豬肉片好薄,通常一片片圓形,你可以一開二,用少少生抽同o急汁去撈一撈佢

跟住爆香洋蔥絲同紅蘿蔔,兩加入肉片炒香,加少少大約2茶匙日式燒烤醬汁(任何牌子都可以甚至A1或OK汁亦可)

跟住試味ok既話就夾晌飯中間


飯更加易,最好用珍珠米,跟住用個圓形模整個造型,然後可以放入焗爐焗到表面脆脆地,如果唔想焗就可以

如果要焗咪用220度焗,時間自己睇下想要既金黃色程度

但我無焗到金黃色就已經要出爐,因為大少爺好肚餓呢


Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密


2013年4月26日 星期五

Oyster & Wine Bar @Sheraton


剛從澳門回來,累得要命~

但都想寫下blog,否則我怕推得太多野,好難償還

今次寫試菜篇,晌 Oyster & Wine Bar @ Sheraton

晌sky lounge隔離,當然有個美景

對食既心情都相對提高,維港既景的確係百看不厭




先來牛肉清湯

燉湯最美妙之處夠熱、能然感覺到清而精華所在

呢杯湯做得到呢



預備食海鮮少不了白酒





 蠔酒吧海鮮拼盤
Oysters, Scallops, half Boston Lobster, Prawns, Scampi or Clams
海7鮮如果係新鮮就點都唔會輸,呢樣好靠餐廳對客人誠意

如果海鮮連基本新鮮既重點都做唔到,就枉費了

見到個海鮮盤,總會盤算食邊款,結果我食了麵包蟹同生蠔呢








凱撒沙律





 美式焗蟹餅

呢個蟹餅用新鮮既蟹肉做成一球

蟹餅通常有一款係用麵包糠包裹蟹肉、洋蔥等

但呢款全個球都的係蟹肉,而質感係有彈性帶蟹既鮮甜味,佢比麵包糠包住那一款最唔同係…佢無麵包糠(哈~唔准噓)

其實正確係佢蟹肉此較大,唔會碎濕濕,即使佢唔用麵包糠都唔會散呢






番茄清湯配西班牙紅花



龍蝦濃湯 






Seafood medley

分別有三文魚、帶子及蝦

三文魚表脆內軟,唔乾,已經做到應有本份

帶子同蝦當然合格




慢煮有機豬肉配帶子


慢煮法國羊髀
呢個羊脾似個盒,佢有羊味但唔會"騷"
我試了少少呢








海鮮四重奏

呢個份量係二人份量

我無試,但的確好大盤  Half Lobster, black Alaskan Cod, King Prawn, Scallop, mashed Potato, Poivrade Artichokes, Saltbush Leaves, Lemon Zest, Caviaroli

真係要兩個人分呢




 moscato

我無飲餐茶,居然要酒
因為我好喜歡飲呢隻甜酒,就咁飲好甜

配甜品時會較有酒香

通常…我飲得開心既酒都係甜的






甜品到

呢度甜品做得好靚,而且都好食

Red Berries Napoleon


White Chocolate Bavarian Cream

中間配有果仁,白朱古力唔太甜,仲有一個脆脆地餅底



Trilogy of Alphonso Mango 
我揀呢個食

唔同既芒果製成品,中間個芒果春卷最好味






Cranberry and Banana Cheese Cake



petit fours係一個脆酥條,好食





Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密


2013年4月25日 星期四

Easy版(胡椒蝦)


今日又過澳門,2013第一過

去威尼斯人參加個嘉年華,明日回來

所以今日既post繼續我既gathering食物

上星期咪寫過胡椒焗蟹既,今次係蝦

蟹既成功率係99%,而蝦係99.9%成功率

0.1%係…你買到唔靚既蝦!否則…好難唔成功

我每個時段都有d覺得一定要整比朋友試既菜式,呢個就係近來我覺得一定要整既

佢既香味值10分架,加上蝦既鮮甜……我而家想再食

蝦有個好處,你一班人食容易預份量,呢度2斤中蝦夠晒10個人,蟹你要買幾多隻先夠呢?

還有蝦容易熟,唔使放入焗爐焗,晌鑊焗已可以

所以人要識腦筋急轉彎,否則就傻更更



食譜:

中蝦 1~2斤(視符你需要)

黑胡椒粒  2湯匙  要輕輕樁下佢,唔使太狠,等佢香味飄出

乾蔥頭   5粒切片

蒜頭 5粒切片

薑  3片

牛油    2湯匙

鹽   半茶匙~1茶匙(視符你偏好鹹度)

花雕酒 半湯匙

做法:

蝦洗淨、剪腳、剪去蝦眼位置,挑腸,索乾水,完完全全索乾水備用

蝦沾上麵粉或粟粉,略為煎一煎佢,煎到金黃色後盛起備用,唔使熟

用約2湯匙牛油起鑊,爆香乾蔥、薑片、蒜片,爆到佢呈金黃色

加入黑胡椒、鹽、蝦,兜勻佢,贊酒、蓋上鑊蓋轉細火焗佢2~3分鐘

打開鑊蓋如果熟就上碟,否則再兜佢兩兜,done~

↓是日姐姐剪漏了蝦腳,但唔介意既話可以唔剪的



Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年4月24日 星期三

紅綠牛(酸辣牛肉沙律)


覺唔覺得呢幾日既相好似同一系列?因為係一個gathering既內食物相

home gathering其實好warm,我好喜歡一班人來我家,又或者去人屋企

所以…我屋企上年試過30個人上我家食,雖然食唔飽,但開心

小小地8個人又係開心

不過整食物招呼人最大樂趣又或者最大難處係到底點樣可以食香味俱存之餘,仲會唔同食物都有

有魚有肉有菜有冷盤有熱盤,最重要係靚

post過勁健康既 山藥、又有爆炸性既脆鱔

今次係有肉有菜既辣辣牛肉沙律,green green地咁啦

有青瓜有車厘茄又有牛扒,哼

將牛扒輕輕辣熟,配上青瓜同車厘茄,最重要加酸辣汁同芫茜,好好食呢

青瓜會出水,食前才撈個汁吧

魚露       4湯匙

糖 5湯匙

青檸汁   2小個,唔夠酸可以加少少白醋

水      5湯匙

鹽 少許

蒜蓉  2茶匙

辣椒 3小隻切碎

青檸葉  3片切碎

芫茜    1小札

以上撈勻放入雪櫃一晚!
*呢個份量整到得約2飯碗既汁,糖份係比較多,注意~自己認為OK先去整,最重要試味



Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密


2013年4月23日 星期二

爆炸(咖哩脆鱔)


昨日一個Green monday

人都 Green起來

今日又變回狂惹既我

人總係矛盾,到某個年歲開始要注重下健康

再唔敢無日無天咁食香口食物

然後會夾硬、強逼、監粗li牙、幫自己洗腦,話比自己聽煎炸野唔好食,唔鍾意食、戒左、最怕香口食物

再下一城洗腦話自己喜歡清淡,有時清淡同無淡好食一線之差

想深一層,保持健康跟本係人生一場革命,呢場革命關乎往後幾十年既性命及生活

一諗到呢到度……又再........夾硬、強逼、監粗li牙、幫自己洗腦,話比自己聽煎炸野唔好食,唔鍾意食、戒左、最怕香口食物

但為免個blog都過於清淡,我場革命未能正式開始

今日仲咖哩脆鱔,哼

食譜:改編自May 姐既書

材料:

中型白鱔    1條(去魚檔叫魚販幫你處理,切成你需要大小)

麵粉

洗鱔用:

粟粉、加鹽

醃料:

咖哩粉  2茶匙

鹽 1茶匙

酒 1茶匙

糖     少少

做法:

將鱔中間既骨都拔走,加鹽同粟粉,輕輕摔佢,摔到佢個皮有dd似潺既物體就沖洗

將鯨鱔完完全全抹乾水,無晒水份

加入調味料醃15分鐘,然後加麵粉,撈到均勻每一塊鱔都沾上麵粉,然後炸大約1分鐘變成卷曲,用吸油紙吸走油份,done

*炸既時候油要夠滾,一放落鑊先會定型夠爽,炸鱔1分鐘至分半鐘OK的話,油要keep住猛火去炸先夠爽身同乾脆
*鱔要新鮮肉質會更有彈性
 




Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年4月22日 星期一

Green Monday(涼拌山藥)


經過兩日吃喝玩樂,今日謝晒

一起身覺得好累,幸好!今日原定都係休息一天

從前被喻為過渡活躍,不停走走跳跳都唔會累

而家…我去五日旅行之後休息番5日先得

玩完兩日都好累!所以……歲月不留人

今日就post一個養生食譜,涼拌山藥青瓜

山藥既係准山未曬乾前既植物,爽甜,有d似…沙葛

但不得不提既係佢本身會有d黏液,係山藥既酵素來的,見到d黏液唔使怕的,但接受唔到唔好勉強

另外…佢外皮有d黑點點,要刨走晒佢,如果有皮膚敏感就帶手套走刨皮同切呢


汁料:

魚露    2湯匙

生抽    2茶匙

糖 2湯匙

麻油    少許

白醋    1湯匙

熱水     2湯匙

蒜蓉   1~2茶匙

以上撈勻加入青瓜及山藥中

山藥先刨皮洗淨,完全刨走晒黑色點點,然後切件,山藥易氧化,可以浸鹽水唔超過1分鐘
(用暖水開稀鹽,一來可以消減農藥、二來可以防變黑)

青瓜切件後與山藥撈勻加上個汁料便可以

*青瓜會出水,所以最好食前才加入


山藥功效(網上維基資料)

能幫助消化
因含有豐富的澱粉質及消化酵素穩定腸道激躁,發揮健胃止瀉的功用

能生津
因含有有豐富的黏液質,對糖尿病人口乾舌燥,小便頻數,身體日漸消瘦,氣虛息短尢具療效,是益陰良藥

具有增強免疫功能
屬中藥藥膳,如大病後用此藥、為養脾第一品

據一項醫學報告指出,山藥功效與人參差不多,身價也相當於燕窩與白木茸[來源請求],更因價格不貴而有窮人補品之稱,因它屬溫、涼補,有補脾氣、益胃等作用,更是滋陰補虛保健食品。
現代科學分析,山藥的最大特點是含有大量的黏蛋白。黏蛋白是一種多糖蛋白質的混合物,對人體具有特殊的保健作用,能防止脂肪沈積在心血管上,保持血管彈性,阻止動脈粥樣硬化過早發生;可減少皮下脂肪堆積;能防止結締組織的萎縮,預防類風濕關節炎、硬皮病等膠原病的發生。
其所含的多巴胺,具有擴張血管、改善血液循環的重要功能,該成分在治療中佔有重要位置。





Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



2013年4月20日 星期六

Jimmy Choo Tea set @置地文華東方酒店


同朋友食完飯,都寫埋呢篇


因為反應太熱烈

話說Jimmy Choo同置地文華東方酒店Crossover

Jimmy Choo既鞋同袋出現晌個afternoon tea內

當然惹起好大既反應,我朋友係熟客都要個半月有多前訂位

基本上你一定要訂位

賣相當然好靚,重點:好食

地點:置地文華東方酒店既 Mo Bar(係置地間)

每人$280一位tea set,另外包埋個甜品buffet!雙重享受

今日我同朋友一行3人開心到癲左咁食Tea

原本我呢輪心情唔好,有d情緒,但個tea後再同另一班朋友晚飯,我有變番開心奶了

教我如何不愛他?你睇

個杯裝甜品最好味,其餘既因為造型需要白朱古力,所以會甜少少


全相,太黑無辦法唔開閃光燈


鹹點好好食,中間紅鞋係鵝肝,同Amber粒鵝肝波波一樣味咁架

好食

個Scone又係太好食





勁愛,太靚




甜品、生果、雪糕任食

好多款揀啊









我揀了呢幾款同芒果


靚鞋陪食





仲有禮物收,食完一行三日再去Jimmy Choo朝聖

開心一日


Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密



Go Organic @ Ambrosia



Organic 對於香港人來講唔陌生

而我自己盡量都會買有機食材,菜、肉類,當然魚肉燒賣、魚蛋等等,我搵唔到有機既

所以只能夠盡量,同埋我食雞多數都買無激素雞

始終我寫食譜,需要唔同食材,有d食材晌香港無法有機的

出街食我又未必會追求有機餐

Ambrosia出有機menu都係好事,至少有間Fine dinning餐廳踏出第一步呢

Ambrosia晌isquare,無得輸既環境



Ambrosia最出名既生蠔

今次我第一次試韓國既蠔,好食,佢好有蠔味,大隻d同爽既

係出乎意料既好食




春天沙律

本地有機蔬菜及意大利血橙,鮮茄配黑醋汁

個醋汁加上蜜糖,配上新鮮既菜,good



本地有機紫番茄配蔬菜、茅屋芝士羅勒汁

茅屋芝士就係近來盛行既布緯治療既芝士,佢味唔係好濃,配上蔬菜唔會搶走蔬菜鮮味呢


法式奶油燉法國有機嫩雞

法國既雞係少沙脂同肉質係結實有彈性d

通常我地食本地雞隻雞脾係貪其滑、同軟熟,但清國雞既質感好唔同

呢個雞隻腿咁大,但因為肉質結實彈性,你唔會覺得好漏,但佢實得來保持嫩既

底個汁好濃郁,有雞肝 (希望我無食錯,因為我當時無問清楚,但感覺似雞肝)、八爪魚等等去做配料





有機法國血鴨及油封鴨三文治配紫包心菜青葡萄汁

血鴨唔係個個都受得到,個鴨係重味,但幸好,個鴨味比想像中輕巧,香港人口味

而個油封鴨 duck confit係我喜愛食物,佢做得酥酥軟軟




有機舞茸菇配百里香意扁意粉

想清清地唔想食肉可以揀呢個



加拿大有機豬腩意大利飯配蘋果汁

在場試過既都覺得呢個豬腩肉好食

我就試過個意大利飯,個飯好食,佢做得到意大利飯應有既質感與味道






甜品:有機草梅湯配法式奶油多士及芝士忌廉mousse

草梅湯佢用大量士多啤梨去燉煮,將d精華逼出,所以佢濃味得來會有點厚滑

因為士多啤梨有果膠,當煮一段時間果膠會逼出

正如做果醬個原理一樣呢

個芝去忌廉mousse,香滑,一個同平日唔同既甜品

呢個有機menu做到5月頭,大家睇完有興趣可以試試呢





Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密

2013年4月18日 星期四

請注意(日式咖哩)


昨日Hea一日,完全無focus想做乜

然後今日又充滿幹勁想出街"冷"

決定是日"冷"街,可憐的,其實我要起書稿,但無奈我完全落唔到筆

有d力不從心……

所以一切決定去完個長trip先算

其實我昨日咁Hea都有好好去反省,反省點解身體與心靈都咁Hea

得出結論…潮濕

咁我就煲去濕湯,又煮飯

煲完個去濕湯點都要煮飯,否則要大少爺飲去濕湯但食飯盒強會好怪

人又hea又要煮飯,結果…我整日式咖哩吉烈豬扒飯

日式行頭,大少爺無得"炸"型的

今次個吉烈豬扒係焗的,其實氣炸鍋都做到,但我個鍋發生問題等換中

所以用焗爐焗,效果…脆既,只需要搽層油就焗得

但請注意:吉烈豬扒要焗,你塊扒沾上麵包糠後一定要放入冰格,雪到硬身

否則個漿唔成型的!注意,請注意!
其次個炒蛋其實唔使不兜爛兜,燒熱隻鑊,加油放蛋,不停向前推,推幾下開始成型就熄火用餘溫推多兩下就得

個日式咖哩買日本咖哩磚,加洋蔥同新鮮紅蘿蔔去煮就得

咁樣堆埋咪又一餐囉!哼



二人份量大約用4粒咖哩磚(一盒通常有6粒至8粒)

先炒洋蔥、加紅蘿蔔,然後放咖哩磚,加大約1杯水,就煮出濃濃日式咖哩味道






Fans page仲有新blog. Click here and like --->   https://www.facebook.com/taisiu9

新facebook acct開始建立,慢慢upload上Fb、講飲、講食、講戰利品
仲會講祕密