2016年12月17日 星期六

瘋狂樹

我覺得自己係爸爸既翻版,佢係一個好瘋狂既人

吃喝玩樂扮靚佢樣樣都做,只要佢覺得開心就會去做

人最重要開心,得快樂時且快樂!所以我都係一個瘋狂既媽咪希望包包開開心心咁過日子

好了解包包既口味,講真…我都知蒸蒸蒸係最好,但日日都係蒸蒸蒸我煮既都悶

所以有時我會煮得特別或者香口d既比佢食,一星期一次開心下都唔係好過份

加上我用米糠油即使煎都唔會太無益呢

佢食得開心我就開心,佢會好記得自己喜歡既食物

包包會同我講:媽咪我想食蝦、意粉,我就會知佢記得白汁蝦意粉

若果佢講:三文魚、醬醬!我就知佢想食煎三文魚配小小沙律醬

所以唔好以為小朋友唔識就獨孤一味呢

12月係好瘋狂既月份,朋友們不停為我慶生日,加上聖誕節、做冬、年尾要完成既工作我都係忙著

所以能夠有時間既話,我必定煮d兩父子喜歡既食物

今晚一家人去街,下午就整呢個日式煎雞聖誕樹比包包做午餐

呢個瘋狂既午餐係有菜有紅蘿蔔有番茄,個雞肉係用日式既做法去煎到表面脆脆地

包包好開心,佢又讚:媽咪,你煮得好好

每當佢見到d食物賣相靚就會讚我呢,哼~


醃料裡面我用兩粒蒜頭磨蓉,因為包包有少少鼻水,我會晌食物中加蒜頭比佢增加抵抗力

大少爺鼻敏感翻發時我都係會用蒜頭煮餸比佢食


烚定西蘭花同紅蘿蔔再切定車厘茄做裝飾




醃料:

雞扒    2件

醬油/生抽   少許(份量剛夠撈勻d雞便可以)

味醂    半湯匙(比包包食既話我唔會加,但加了好食d)

糖   1茶匙

鹽   少許

黑胡椒   少許

蒜頭   1-2粒(磨蓉)

另備:低筋麵粉  3湯匙、片粟粉或生粉  2湯匙

做法

我用有機雞扒去皮起肉,去皮盡量去有d黏到好實我就由得佢再切件,將所有醃料加入雞中撈勻醃30分鐘


醃好後就加入低粉及生粉撈勻,然後就煎(油要多少少)

要熱鑊熱油放雞肉去煎封表面再用中火去煎至微金黃色

轉大火逼出油份及雞肉轉為金黃色便可以

將雞肉放上菜上唧沙律醬,再放上裝飾便完成


沒有留言:

張貼留言

歡迎大家留言,但會先檢閱先會顯示,謝謝
此舉避免無聊九唔搭八人滋擾