2016年12月30日 星期五

2016完滿禮物

呢個應該係2016年最後一個食譜,我對今年成績都幾滿意

起碼都做到好多大家都喜歡既食譜

工作上都算順利(除了成日為追稿費勞氣),出埋暫時最後一本書

包包又算健康又考得入理想幼稚園

你問我今年有無唔開心?當然有啦!但總括來講無乜唔開心係值得我帶到明年的

今年最後一份食譜大家未必會跟住整

一來唔係個個識整麵包、二來唔係個個都會肯去炸、三來唔係個個喜歡donut

冬甩/甜甜圈對我來講係滿有回憶,爸爸有下午茶習慣,每次去街到下午總會去飲咖啡

佢帶我去中環間 Furama富麗華酒店(已結業)飲咖啡時就會叫 冬甩比我食

間酒店有條長樓梯,我就晌樓梯玩直到有冬甩食就會乖乖返埋位

其實我已經忘記那冬甩既味道,只知道…長大後從來都無乜食過好食既冬甩

大少爺都喜歡食冬甩,不過…佢當然無我咁好彩能夠食到當時來講好架勢既酒店冬甩

但而家我終於做到滿意既冬甩,剛做起鬆軟得來又帶有香氣,不枉我堅持做一次

就當係2016年比自己既禮物,願我2017年繼續開開心心,我既家人健康快樂

無論自己與家人都工作順利吧~

大家都新年快樂~


食譜:

高筋麵粉    112g

低筋麵粉   13g

奶    45ml

水   25ml

糖   15g

鹽   1/4茶匙

牛油   12g

蛋黃   1個

酵母   2g

*我將所有材料放入麵包機搓,完成搓麵糰及發酵後取出

如果無麵包機就用手搓至光滑便完成,用手搓鹽同糖要先放麵粉底,避免直接接觸酵母

而奶及水最好分幾次加入就會容易搓(起初好黏時可以撻下佢)跟住就用乾布蓋著發酵大約30-40分鐘(視乎天氣而定或發大兩倍為準則)

無論機搓或手搓完成第一次發酵後就分成6份,每份大約40g

滾圓後壓平再捲起(如下圖)


用一塊乾布蓋著,再蓋上一塊濕布靜置15分鐘


15分鐘後就用手壓平(如下圖)


再卷成條狀(如下圖)


跟住就做成個圈型,再按實個封口,進行第二次發酵

用乾布蓋著大約發酵30分鐘(視符天氣溫度),總之夠2倍大便可以

拎起毛巾再靜置10分鐘,等佢表面乾身便可以


油去到一半便可以,炸至金黃色

都係果句,油並不可怕但要視乎你用乜油,呢幾年用米糠油我就放心去炸呢


密實袋放入白砂糖,放入冬甩圈搖呀搖搖沾滿砂糖便可以






大少奶's Delicatessen

宣傳你的專頁

極度出色 @萬豪中菜廳

早陣子食界有位總廚Jayson爆紅,當時佢剛轉到萬豪中菜廳

而我早於晌國金軒已經認識佢,當時已經覺得佢做既菜式好出色

最深刻係佢用個白粥底去煮蔬菜、同埋個椰皇燉湯

所以知道佢轉去萬豪中菜廳後我都有去捧場

識我既人或睇咁多年blog、FB既都知我係多年JW既捧場客

大住個肚既時候試過一星期去兩日JW食Tea,當年我介紹完大長tea好多人去訂位試

但近年無論cafe或lounge既自助餐、Tea等等都未再見進步,相反退步了

估唔到因為鄧師傳令到JW又再變得鬧哄哄

無論點心或主菜都出色,我一直想帶大少爺同包包去食

終於book到新年會同兩父子去食飯呢

前晚好友 Belle為我慶祝生日,我同佢都一致想去捧Jayson場

我近年唔係餐餐飯都寫blog,只寫值得寫既

也謝謝Jayson為我倆設計餐單,呢一樣的確大滿足呢


先來點心:一品野菌餃、萵荀及蟹肉紅菜頭粿

點心皮做得又薄又滑


"金池玉枕"呢個用大量蝦、龍蝦、蟹殼去淆汁

個湯汁又鮮又濃,加上陳村粉已經好好食

隻大蟹鉗又鮮甜,我第二次食依然有感動既感覺


繡球蟹肉清湯

繡球內係大量大量既蟹肉,個清湯望落好清

但內裡係用蟹、田雞、雞蓉、海帶等等去淆做出來既湯清到不得了

鮮甜味又甜到不得了

鄧師父人好年輕但卻掌握到做湯既技巧


濃湯酸菜魚

係新既菜式,晌FB都見過人提過,前晚終於自己試到

呢個酸菜魚除了酸味仲有花椒既麻香

舌尖被麻香充斥,個酸菜配鮮甜既魚令魚更甜

雖然個湯底係濃但又唔會漏的確出色


香醋蟹肉糯米飯

呢個先不可思議,我同belle已經叫飽時仍然食晒成個糯米飯

飯頂既係份子料理常見既粒粒,咬開係黑醋

用蟹肉去配糯米飯感覺無咁油膩,就係咁…食晒


謝謝Jayson為我預備了壽包,個壽包裡面蓮蓉係軟心的並非硬掘掘

仲有葛仙米杏仁茶


呢個係我同belle額外order

呢個紫薯脆炸鮮奶配楊枝甘露

我上次食過勁想再食,紫薯包住裡面既係鮮奶,最頂癮係外層酥脆之餘仲有海鹽焦糖醬

呢個新年我一定訂定比大少爺食,佢一定喜歡的


2016年12月29日 星期四

起晒摃

一定要感謝天父即使包包一場病令聖誕變得靜寂,但包包最後都康復

祈禱唔係要天父有求必應你要乜就比乜你,而係有著信心去面對一切

天不會常藍但至少彩虹始終會出現~

終於晌平安夜當日包包退晒燒

三年零八個月抗戰終於勝利,由20號晚開始至到24號足足四日我都無覺好瞓

每日都睇住個仔退燒又再發高燒來來回回的確乜心情都無晒

到聖誕節當日雖然所有節目取消我覺得好悶,仍唔敢帶包包外出

最後有兩個唔怕傳染既朋友來陪我一家晚飯,我亦都可以過下手癮煮幾樣食物

叫做都有番d生氣丫

平日係唔會自己入街市,假日就會入去海鮮檔睇下有乜買,本身入去係睇下有乜材料煮比兩個朋友食

見到海鮮檔有一盤蟹鉗賣,呢d蟹鉗好明顯係d蟹哥蟹姐掙扎時留下的,然後店主集齊咁多一盤去賣

有成廿幾三十隻,當時望咗一陣到底可以用來做乜?無理由整西餐但加個蛋白蒸蟹鉗

如果整蟹餅包包見到又話想食,咁熱氣當然唔可以比剛病好既佢見到

最後不顧一切都係買完先算,邊行邊諗決定整意粉

用白汁去煮再加黑松露,用黑松露醬有個要袂就係其他材料既味道要夠低調唔好搶味

蟹肉甜甜得來唔會太搶味、配上日本本菇又唔會似磨菇咁濃味道

就係咁呢個"黑松露鮮蟹肉意粉"就成功了,哼~


放入蒸爐蒸20分鐘放涼就拆得,我忍唔住食了不少


大少爺見到我瘋狂咁拆蟹肉覺得好不可思議

我個人最怕重複做同一動作,卻坐定拆晒蟹肉出來

個重點係....我真係好鍾意拆蟹肉,廿幾三十隻蟹鉗拆出來其實得一碗

新鮮蟹肉就係鮮甜,同罐裝蟹肉跟本不能相題並論


食譜:

蟹肉    大量

本菇    一pack

淡忌廉    100ml

鮮奶   100ml

雞湯    100ml

黑松露醬   1湯匙

麵粉    1湯匙

鹽    少許

意粉    隨意(視符自己所需份量)

做法:

意粉先煮至7成熟過冷河備用

先用油爆香本菇再加蟹肉兜勻,加入麵粉炒勻



分數次加入淡忌廉,每次都要攪勻防起粒

然後加奶及雞湯煮滾個汁,放入意粉兜勻,試味加少許鹽

最後熄火加入黑松露醬兜勻便可以上碟

*黑松露醬必需最後熄火先加






大少奶's Delicatessen

宣傳你的專頁

2016年12月24日 星期六

Merry Christmas

各位:聖誕快樂!

一如以往大家應該知道我會有豐富節目?去街、整聖誕餐、開party........

但今年取消晒

由做冬當日開始包包喉嚨發炎不斷發高燒,我已經3、4晚無乜好瞓過

即使佢即刻好番都要休息多幾日,所以我就將所有節目取消

加上我同大少爺都好累,相信咁多年以來最靜寂既聖誕

只要個仔好番,慢慢見佢再回復馬騮,我就心足了

願主醫治包包!Amen

以下呢張自製聖誕咭個cupcake係我整既,上面係栗子cream,但唔寫食譜喇因為唔算太滿意呢



大少奶's Delicatessen

宣傳你的專頁

2016年12月23日 星期五

Birthday brunch @ Amber

一 直都想寫番呢篇生日篇

其實係想記低今年生日,可惜…我由月頭病到連包包都病了,已經取消或改期幾個慶生飯聚

今年第一餐生日飯係好友 Joanne為我慶祝

佢兩個月前已經約定我仲book定位,久不久又會提我一次

哈~係人都知我生完包包後十分無記性

對上一次去Amber係六年前大少爺與我慶祝生日

老實講在公在私我都走訪過好多餐廳,你問我深印像既就幾間

Amber係其中之一,估唔到隔咁多年價位都只係加了百幾蚊

Fine dining既價值係大廚功架!所以無話值唔值的


6個 course $928一位,另外會幫你pairing酒

但我同朋友都唔飲酒,就有不同既果汁去pairing



難以抗拒既baguette bread

近年我唔喜歡食麵包,但Baguette例外,呢度同Hugo's既一樣好味


先來前菜:咸甜酸苦

從前我會話你知我只能吃甜不能吃苦,但人生苦與甜唔係自己控制得到

但沒有苦豈知甜?


頭盤我揀了生蠔

生蠔其實已經煮熟,面層有青蘋果冰及清酒

將青蘋果冰配上生蠔意外既夾及fresh


 Middle course我揀北海道帶子配紅脆米

帶子我覺得熟了點,如果中心位生少少會更好


主菜我揀了鱈魚

識我既人都知道我係牛魔王,但我無選擇牛扒

因為好既餐廳既牛肉一定係用最上盛

所以你要知個廚既功夫,就揀d要考功夫既,呢個油封鱈色柳係用油封既方式去slow cook

而slow cook既特色就係要令人感覺生與熟之間

呢個當然滿分啦


Cheese platter

較喜歡軟芝士,但我對羊奶芝士好抗拒,反而藍芝士我接受得到,但如果有蜜糖去配藍芝士會更完美


甜品

兩個甜品,一個係蛋黃蛋糕配梨汁


黑加侖子雪萉配朱古力mousse cake


petit fours 也絕不欺場的

呢餐後…就同一家幾口既好姊妹食生日晚飯



正日當然同我最愛既大少爺及包包過,多謝大少爺送既禮物、蛋糕同鮮花

幾乎每年我生日正日都入迪士尼,當日玩得好開心

聖誕後繼續食生日飯呢,得閒我會再報導




仲有早幾晚原本約了幾個朋友去食飯,卻因我又唔舒服缺值

結果…被供奉,哈哈~


video
宣傳你的專頁 大少奶's Delicatessen

宣傳你的專頁

2016年12月21日 星期三

冬至快樂

各位冬至快樂

唔記得邊年開始,我習慣去煮冬至晚飯

從前對節日無乜感覺既忽然傳統起來,過時過節做節係重要

但生了包包後好似總係忙著變了出街食,今年又決定自己煮同埋大少爺家人一齊食

上星期炆了南乳豬手比大少爺佢讚不絕口,我完全唔食豬手連坐月都唔肯去食

炆豬手比大少爺純粹佢喜歡,只要佢喜歡我就會去做

佢話冬至又想再食當然我係會再整

上次炆時忘記了買花生,今次記得買花生仲加雲耳同枝竹

咁我都可以食雲耳同枝竹,幾開心!我唔會因為自己唔食而唔去做,而係諗下當中我可以加d乜令自己可以同佢一齊食

一大早開始預備,因為包包比我感染了發燒,所以要早d做好晒然後專心照顧包包

中午就出得食譜,雖然大家未必趕得切整,但寫定過年前食團年飯時都整得嘛

何況...呢d "佬物",好多佬都喜歡呢



食譜:

斬件豬手   一隻

花生     隨意

雲耳     隨意

炸枝竹   一包

薑、蔥、蒜頭    適量

南乳    半件

生抽    半湯匙

磨豉醬   1湯匙

冰糖     適量

水      蓋過面

老抽      少許

酒        少許

做法:

煲滾水放薑、蔥、酒,加豬手滾20分鐘後就撈氣沖凍水備用

爆香薑、蔥後就加入豬手兜勻


加入蒜頭、南乳用小火兜勻

加入磨豉、生抽、後加水蓋面,最後加冰糖

滾後可以加花生,炆大約2小時後蓋上蓋熄火焗至涼為止,如果唔夠稔身可以再煮耐d

因為有d人鍾意完全淋晒,有d喜歡有質感

雲耳同枝竹可以食之前30分鐘先煮







大少奶's Delicatessen

宣傳你的專頁

2016年12月19日 星期一

啤一啤


無錯!基本上成個12月我都晌慶祝 mode裡面

雖然來緊做冬、聖誕好忙,有些朋友聖誕唔可以一齊玩

於是我就搞個小小既生日party叫朋友上來吃飯

好多朋友呢個月都會約我出外食生日飯,但我總係有心癮想自己煮一餐

屋企搞聚會係開心既,又有人陪包包玩

對於我來講煮嘢係唔辛苦的,煮30人既聚會都試過,10個人唔夠既真係同便飯無乜分別

而且我又可以研究下新菜式,今次焗啤酒雞,估唔到呢個焗雞咁好食

隻雞坐住罐啤酒,焗既時候啤酒會產生蒸氣咁隻雞裡面係蒸焗緊,亦都同"扣"既方式近似

而雞皮位置會脆身、加上打直去焗油份會流到焗盤中,雞皮內脂肪都會流出

雞肉焗完後變得鬆化同帶有啤酒既麥香

呢隻雞比我想像中受歡迎,朋友話下次一定要再食,下次要焗夠2隻先夠

重要係:佢好容易整呢


今次我又整了 bikini sandwich,裡面係黑松露醬同mozzarella cheese

用煎既方法令佢香脆


近幾次聚會都有呢個芝士春卷,太受歡迎

個個食過都話下次要食,咁我唯有每次都整唔同餡料


今次係煙三文魚配菠菜

結論係:我覺得最好食係磨菇配芝士加煙三文魚


忙亂中影既白汁蝦肉一鍋意粉,佢好食但今次無時間影得靚


點都要有沙律的





我今年第四個生日蛋糕呢!多謝


好!係時候要寫隻焗雞食譜:

雞    1隻

啤酒    1罐

蒜頭    3-4粒磨蓉

鹽    1湯匙(只需要搽勻隻雞便可以)

黑胡椒    少許

檸檬汁   半個

蔬菜    隨意

做法:

雞洗淨抹乾水(我用法國無激素雞)

早一晚醃定隻雞, 用鹽、胡椒、蒜泥、檸檬汁撈勻,前前後後左左右右裡裡外外都搽勻

然後包好雪一晚

焗之前拎出來回溫30分鐘,焗之前10分鐘用半罐啤酒淋一淋雞身,啤酒會令雞肉鬆化

用罐頭刀打開個啤酒罐頂(唔好倒瀉d啤酒),然後打直放隻雞上去(令雞坐上啤酒)

*由話隻雞較大隻,我要將啤酒罐剪成一半高度

放上焗盤加上菜蔬,我用紅蘿蔔、洋蔥、薯仔等等

由於隻雞打直,個頂部容量焦黑,我會晌頂加塊錫紙,雞亦尖位都要

用200度火焗40-50分鐘,或呈金黃色便可以 


稍為放涼後將雞剪件,罐啤酒可以淋上菜蔬上及點雞用,唔好浪費

因為佢除了啤酒外仲會有焗出來既雞汁,d菜蔬吸收日月精華後又係特別好食的



大少奶's Delicatessen

宣傳你的專頁